مۆندیال لە لێواری داڕماندایە؛ گهورهكانی ئەوروپاش هەڕەشەی بایكۆتی مۆندیال دەکەن
پێشتر نۆ وڵات بایكۆتی مۆندیالی كردووه
یاریگا –
ئامادەکارییەکان بۆ مۆندیالی 2026 کە بڕیارە لە وڵاتانی ئەمریکا، مەکسیک و کەنەدا بەڕێوە بچێت، تێکەڵی چەندین کێشەی سیاسی و توندوتیژی نێودەوڵەتی بووە، ئەمەش سێبەرێکی تاریکی خستووەتە سەر ئەم پاڵەوانێتییە چاوەڕوانکراوە.
ئاڵۆزییەکانی سەردەمی تڕەمپ و مەترسیی بایکۆت
هەڕەشەکانی دۆناڵد تڕەمپ، سەرۆکی ئەمریکا، بۆ سەپاندنی باجی گومرگی بەسەر چەند وڵاتێکی ئەوروپیدا، پرسیاری زۆری لای هەڵبژاردەکان دروست کردووە، بەتایبەت ئەڵمانیا، هەروەها پەرەسەندنە سەربازییەکان و ڕووداوەکانی ناوخۆی ئێران، بەتایبەت دوای گیانلەدەستدانی ڕێبەری باڵای ئەو وڵاتە عەلی خامنەی، وای کردووە بەشداریکردنی ئێران بکەوێتە ژێر گومانێکی گەورەوە.
تڕەمپ جگە لە هەڕەشەی سەپاندنی 10% باج بەسەر هاوردەی وڵاتانی وەک (دانیمارک، نەرویج، سوید، فەڕەنسا، ئەڵمانیا، بەریتانیا، هۆڵەندا و فینلەندا)، باسی لە ئارەزووی خۆی کردووە بۆ لکاندنی گرینلاند بە ئەمریکاوە بەهۆی هۆکاری ئەمنی، کە ئەمەش نیگەرانیی لای دانیمارک دروست کردووە.
دۆخی ئێران و یارییەکانی لە ئەمریکا
بڕیار بوو ئێران سێ یاری لە قۆناخی کۆمەڵەکان لە ناو خاکی ئەمریکا دهكات:
15ی حوزەیران: بەرامبەر نیوزیلاند لە لۆس ئەنجلۆس.
21ی حوزەیران: بەرامبەر بەلجیکا لە لۆس ئەنجلۆس.
26ی حوزەیران: بەرامبەر میسر لە سیاتڵ.
دوای ئهم رووداوانه مەهدی تاج، سەرۆکی فیدراسیۆنی تۆپی پێی ئێران، رایگەیاندووە کە بەهۆی رووداوەکانی دوایی، بەشداریکردنی وڵاتەکەی دوورە. جگە لە ئێران، دەنگۆی بایکۆتکردن هەریەک لە ئەڵمانیا و ئیسپانیایشی گرتووەتەوە پێشتر ئهم دوو وڵاته ههرهشهیان كردووه چاوهڕوانی وهڵامی ئهمهریكان.
مێژووی بایکۆت؛ 9 وڵات کە پێشتر کشاونەتەوە
کشانەوە لە مۆندیال رووداوێکی نوێ نییە، لێرەدا ئەو نۆ هەڵبژاردەیە دەخەینە ڕوو کە پێشتر بایکۆتیان کردووە:
ئۆرۆگوای (1934): وەک یەکەم پاڵەوانی مۆندیال، رەتیکردەوە بەرگری لە نازناوەکەی بکات، وەک ناڕەزایەتییەک بەرامبەر بایکۆتکردنی مۆندیالی 1930 لەلایەن وڵاتانی ئەوروپاوە.
ئینگلتەرا (1934): بەشداری نەکرد چونکە لەو کاتەدا پێیان وابوو پاڵەوانێتییە ناوخۆییەکانی بەریتانیا گرنگترن.
سکۆتلەندا (1934): بە هەمان هۆکاری ئینگلتەرا بەشداری نەکرد.
وێڵز (1934): بە هەمان هۆکار بەشداری نەکرد.
ئیرلەندا (1934): بە هەمان هۆکار بەشداری نەکرد.
ئەرجەنتین (1938): بایکۆتی کرد چونکە ناڕازی بوون لەوەی مۆندیال لە جیاتی ئەمریکای باشوور لە ئەوروپا كرا.
هیندستان (1950): رایانگەیاند مۆندیال ئەوەندە گرنگ نییە، هەرچەندە دەنگۆی ئەوە هەبوو فیفا ڕێگەی پێ نەداون چونکە یاریزانەکانیان دەیانویست بە پێ پەتی یاری بکەن.
تورکیا (1950): بەهۆی کێشەی دارایی و گرانی تێچووی گەشت بۆ ئەمریکای باشوور کشایەوە.
یەکێتیی سۆڤیەت (1974): رەتیکردەوە یاریی گەڕانەوەی پاشکۆ بەرامبەر چیلی بكات، چونکە یارییەکە لە یاریگایەک بوو کە دوای کودەتا سەربازییەکەی چیلی وەک زیندان بەکار هاتبوو.
