ئینتەر میلان ماڵئاوایی لە چامپیۆنزلیگ كرد و چیڤۆ پیرۆزبایی لە بۆدۆ گلیمت دەكات
بۆدۆ گلیمت ئینتەر میلانی لە چامپیۆنزلیگ كردە دەرەوە
یاریگا –
كریستیان چیڤۆ، راهێنەری یانەی ئینتەر میلانی ئیتاڵی ئاشكرایكرد كە شایستەی گەیشتن بە قۆناخی داهاتوو نەبوون.
شەوی رابردوو ئینتەر میلان لە یاریگای خۆیدا میوانداری بۆدۆ گلیمتی كرد و یارییەكەش بە بردنەوەی یانەی میوان بە ئەنجامی دوو گۆڵ بەرامبەر گۆڵێک كۆتاییهات.
بۆدۆ گلیمت بە ئەنجامی هەردوو یاریی پێنج بە دوو یارییەكەی لە ئینتەر میلان بردەوە و خۆی گەیاندە قۆناخی شازدەی چامپیۆنزلیگ و یانەی ئیتاڵییەكەی لە پاڵەوانییەتیەكە كردە دەرەوە.
Fischio finale pic.twitter.com/MBXSeTawF1
— Inter ⭐⭐ (@Inter) February 24, 2026
لە دوای یارییەكە كریستیان چیڤۆ گوتی:
لە سەرەتاوە هەموو هەوڵێکی خۆماندا، رووبەڕووی تیمێکی زۆر رێکخراو بووینەوە کە بەرگرییەکی چڕیان دەکرد و 10 بۆ 11 یاریزانیان لە دواوە هێشتبوویەوە. رەنگە توانای ئێمە بۆ یەکلاکردنەوەی یارییەکە ئارامییەکی دەروونی زیاتری پێ بەخشیبن، چونکە دەیانزانی ئێمە پێویستمان بە دوو گۆڵە بۆ ئەوەی یارییەكە بگاتە كاتی زیادكراو.
هیچ گلەییەکم لە یاریزانەکانم نییە، ئەوان بە هەموو وزەی خۆیانەوە هەوڵیاندا، بەڵام لە گێمی دووەمدا تیمی بۆدۆ زۆر لە ئێمە چالاکتر بوون. هەموو هەوڵێکماندا بۆ ئەوەی گۆڵی یەكەم بكەین، بەڵام دوای پشووی نێوان گێمەكان ئەوان دوو گۆڵیان كرد.
خەمبارییەکی گەورە هەیە، چونکە بەداخەوە رووبەڕووی تیمێک بووینەوە کە زۆر لە ئێمە باشتر بوون. ئەوان زۆر رێکخراو بوون و بە لێهاتووییەوە ئەنجامیاندا. تەنیا دەتوانین پیرۆزبایی لە تیمی بۆدۆ گلیمت بکەین، ئەوان شایستەی گەیشتن بە قۆناخی داهاتوو بوون.
