کۆنۆر برادلی پەیامێک لەبارەی پێکانە سەختەکەی بڵاودەکاتەوە

یاریگا –

کۆنۆر برادلی، بەرگریکاری یانەی لیڤەرپووڵ لەدوای ئەنجامدانی نەشتەرگەری دەست بە پڕۆسەی چاکبوونەوە دەکات و لەوبارەیەوە پەیامێک بڵاودەکاتەوە.

بەرگریکارە 22 ساڵانییەکە، لە یاریی یانەکەی بەرامبەر یانەی ئارسیناڵ لە یاریگای ئیماڕات، لە کاتی زیادکراوی گێمی دووەمدا تووشی پێکانی ئەژنۆی هات و دواتر یانەی لیڤەرپووڵ رایگەیاند کە پێکانی بەرگریکارەکەی سەختە و نەشتەرگەری بۆ دەکرێت.

برادلی لە تۆڕی کۆمەڵایەتی ئینستاگرام رایگەیاند کە نەشتەرگەرییەکەی سەرکەوتوو بووە و ئێستا سەرنجی لەسەر چاکبوونەوەیەتی.

گورزێکی گەورە بوو، بەڵام نەشتەرگەرییەکە تەواو بوو و ئێستا گەڕانەوە دەستپێدەکات، هەرچەندە ماوەیەکی کەم نابێت بەڵام ناتوانم چاوەڕێی گەڕانەوە بم بۆ یاریکردن بۆ لیڤەرپووڵ و ئێرلەندای باکوور و سوپاسی پشتگیریتان دەکەم.

پێکانەکەی برادلی بەهۆی رووداوەکەی گابرێیل مارتینێلی بووە جێی سەرنجی زیاتری میدیاکان، کاتێک لە کاتی پێکانەکەی بە شێوەیەکی دوور لە گیانی وەرزشی مامەڵەی لەگەڵ بەرگریکارەکە کرد و پاڵی پێوەنا، دواتر مارتینێلی داوای لێبووردنی لە یاریزانەکە کرد.

بەرگریکارە ئێرلەندییەکە ئێستا لەگەڵ کات لە پێشبڕکێدایە تاوەکو بە تەواوەتی چاکببێتەوە و بۆ مۆندیالی 2026 ئامادەبێت، ئەگەر هەڵبژاردەکەی بتوانێت سەرکەوتن بۆ پاڵەوانێتییەکە مسۆگەر بکات.

کۆنۆر لەم وەرزە 21 یاری بۆ رێدز ئەنجامداوە، ئەمە سەرەڕای تووشبوونی بە پێکان لە سەرەتای وەرز.