دوایین پەرەسەندن؛ رۆدریگۆ بڕیاری جێهێشتنی ریال مەدرید دەدات

یاریگا –

رۆدریگۆ، هێشبەری بەڕازیلی بەتەواوی خۆی یەکلاییکردووەتەوە بڕیاریداوە ریزەکانی ریال مەدرید جێبهێڵێت.

رۆژنامەی ئاس بڵاویکردووەتەوە، رۆدریگۆ چەند مانگێکە بڕیاری کۆتاییداوە و ریال مەدرید جێدەهێڵێت، بڕیارەکە گەڕانەوەی نییە و بەتەواوی خۆی یەکلاییکردووەتەوە.

بەگوێرەی هەمان سەرچاوە، رۆدریگۆ سەرەتا بریکارێکی کارەکان دادەمەزرێنێت، ئێستا لەگەڵ دوو بریکار لە گفتوگۆدایە و هەفتەی داهاتوو یەکێکیان هەڵدەبژێرێت.

رۆژنامە ئیسپانییەکە روونیکردووەتەوە، بەهۆی پێکانی زۆربەی هێرشبەرەکان و دۆخی ئێستای ریال مەدرید، رۆدریگۆ لەم زستانە ریال مەدرید جێناهێڵێت و تاوەکو هاوین چاوەڕوان دەبێت.

رۆدریگۆ دەیەوێت ئەم وەرزەش لەگەڵ ریال مەدرید بەڕێبکات و پاشان بەشداریی مۆندیالی 2026 بکات، دوای مۆندیالیش پەیوەندی بە یانەیەکی نوێ بکات.

لە پرێمەرلیگ ئارسیناڵ، مانچێستەر سیتی و لیڤەرپوول گرنگی بە یاریزانەکە دەدەن، پاریس سانجێرمانی فەڕەنسیش چاوی لەسەرییەتی.

رۆدریگۆ ساڵێکی سەختی لەگەڵ ریال مەدرید بەڕێکرد و نەیتوانی 32 یاریی بەدوای یەک گۆڵ بکات، بەڵام لە یارییەکەی مانچێستەر سیتییەوە ئاستی وردە وردە بەرزدەبێتەوە و دەستی بە گۆڵکردن کردووەتەوە.