ئۆفەرێکی چەور بۆ رودیگەر هاتووەتەپێش
یاریگا –
ئانتۆنیۆ رودیگەر ئۆفەرێکی نایابی بۆ هاتووەتەپێش و رەنگە دوودڵ نەبێت لە قبووڵکردنی.
بەرگریکارەکەی ریال مەدرید کە دوو مانگیتر تەمەنی دەبێتە 33 ساڵ و لە هاوینی ئەم ساڵ گرێبەستەکەی بەسەردەچێت، بووەتە ئامانجی پاریس سانجێرمان و یانە فەڕەنسیەکە ئۆفەرێکی چەوری خستووەتە بەردەمی.
بەگوێرەی زانیارییەکانی FutDestrangisی ئیسپانی و نزیک لە یانەی ریال مەدرید، پاریس ئۆفەرێکی خستووەتە بەردەم یاریزانە ئەڵمانیەکە کە لە رووی مووچەوە، ئەگەرچی بڕەکەی ئاشکرا نەکردووە، زۆر لەوەی ئێستا لەگەڵ یانە شاهانەکە وەریدەگرێت.
جیا لە مووچەکەش، وەک سەرچاوەکە ئاشکرای کردووە، خاڵێکی دیکەی ئۆفەرەکە کە رەنگە بەتەواوەتی سەرنجی رودیگەر رابکێشێت ماوەی گرێبەستەکەیە کە پی ئێس جی پێی دەدات. لەکاتێکدا کە ریال مەدرید بۆ درێژکردنەوەی گرێبەستەکەی ئێستای ئامادەن تەنها بۆ ساڵێکی دیکە بۆی نوێ بکەنەوە، بەڵام پاریسیەکان دەیانەوێ دوو ساڵ و لەگەڵ بژاردەی ساڵێک زیاتریش ببیبەنە باخچەی شازادەکان.
📌 #Rudiger SE LO PIENSA 📌
El central del #RealMadrid tiene una OFERTA sobre la mesa del #PSG ( como ya adelanté hace más de una semana ) muy superior económicamente a la del club blanco
Otro punto diferencial en la oferta respecto a la de renovación del Real Madrid son los… https://t.co/WQq6F13V8s pic.twitter.com/0TcDCLpXqo
— Futbol del Sr.Destrangis (@FutDestrangis) January 1, 2026
ئانتۆنیۆ هاوینی 2022 وەک یاریزانی ئازاد بەخۆڕایی لەدوای بەسەرچوونی ماوەی گرێبەستەکەی لەگەڵ چێڵسی، گواسترایەوە بۆ ریزەکانی مێرێنگی. لەگەڵ یانەکەی پایتەختی ئیسپانی 7 نازناوی بردووەتەوە، لەنێویاندا لالیگا و چامپیۆنزلیگیش هەیە.
