سۆران سەلیم: کارمان لەسەر هەڵەی یاریی رابردوو کردووە و بۆ سەرکەوتن لە بەغداین

یاریگا –

سلێمانی لە دەرەوەی یاریگای خۆی رووبەڕووی سیکەک دەبێتەوە، راهێنەری تیپەکەش باس لە ئامادەکاری تیپەکەی دەکات.

لە گەڕی دووەمی خولی پلە دووی عێڕاق، سلێمانی لە دەرەوەی یاریگای خۆی و تایبەت لە بەغدا رووبەڕووی سیکەک دەبێتەوە، بۆ ئەم مەبەستەش سلێمانی دوا یەکەی مەشقی خۆی کرد و تەواوی یاریزانەکانیشی بۆ یارییەکە ئامادەن.

سۆران سەلیم، راهێنەری سلێمانی باسی لە ئامادەکاری تیپەکەی کرد بۆ یارییەکە گووتی:

ئامادەکارییمان بۆ یارییەکە تەواو کرد و سەرجەم یاریزانەکان ئامادەن، سوپاسی کارگێڕی یانەکە دەکەم کە پاڵپشتی تەواوی تیپەکەن، کارمان لەسەر هەڵەکانی یاریی رابردوو کردووە و هەوڵدەدەین کەمترین هەڵە بکەین لەم یارییە، وا لە یاریزانەکانمان گەیاندووە کە یاریگای ناوەوە و دەرەوە جیاوازی نەبێت و بۆ سەرکەوتن یاریی بکەن، پلانی مەشقەکان لە یارییەکان جێبەجێ دەکەین و بۆ ئەوەی بتوانین سێ خاڵ بەدەستبهێنین.

لە کۆمەڵەی یەکەم سلێمانی بە یەک خاڵ لە ریزبەندی پێنجەم دێت و  نەسڕی ئەنبار بەسێ خاڵ لە پێشەنگی کۆمەڵەکەیە.