یاریگا –
گازی باکوور دووەم سەرکەوتنی بە دوای یەکی بەدەستهێنا و راهێنەری پێشمەرگەی سلێمانیش هەڕەشەی دوورخستنەوەی لەسەرە.
لە گەڕی نۆیەمی خولی نایابی عێڕاق، گازی باکوور لە یاریگای خۆی بە ئەنجامی 2 _ 1 لە رەمادی بردەوە، دووەم سەرکەوتنی بەدوای یەک بوو گازی باکوور بەدەستیهێنا دوای ئەوەی هەفتەی رابردوو لە دەرەوەی یاریگای خۆی 1 _ 0 سەرکەوتنی بەرامبەر کەربەلا بەدەستهێنابوو.
تا ئێستا نوێنەرەکەی شاری کەرکوک لە خولەکە سێ سەرکەوتن و پێنج بەرامبەر بوون و یەک شکستی هەیە، 14 خاڵی هەیە و هاتە ریزبەندی چوارەمی خولەکە، گەڕی داهاتووش لە بەسڕە رووبەڕووی نەفتی بەسڕه دەبێتەوە.
پێشمەرگەی سلێمانی جارێکی دیکە تووشی شکست هات، پێشمەرگە لە دەرەوەی یاریگای خۆی بە ئەنجامی 2 _ 1 بە جەیش دۆڕا، دوای ئەم شکستە و بە هۆی ئەنجامە خراپەکانی تیپەکە، ئەرسەلان جەلال، راهێنەری پێشمەرگەی سلێمانی مەترسی دوورخستنەوەی لەسەرە و کارگێڕی تیپەکە لە چەند رۆژی داهاتوو کۆبوونەوەی نا ئاسایی دەکات.
لە نۆ یارییدا پێشمەرگەی سلێمانی پێنج شکست و سەرکەوتنێک و سێ یەکسان بوونی هەیە، شەش خاڵی کۆکردۆتەوە و لە ریزبەندی 18ـی خولی نایابی عێڕاق مایەوە، گەڕی داهاتووش میوانداری بەحری دەکات.
