تەواوکردنی هاوکێشەی کەین و بارسێلۆنا چۆن سەردەگرێت؟

یاریگا –

چەند هەفتەیەک بۆ دەستپێکردنی بەشێکی نوێی چیرۆکی هاری کەین لە بایرن میونشن دەستپێدەکات.

رۆژنامەی بیڵد بڵاویکردووەتەوە، لە ماوەی داهاتوو کەیسی کەین دەگاتە قۆناخی یەکلاییکەرەوە، ئێستا بارسا بە هەموو شێوەیەک هەوڵی گواستنەوەی ئەستێرە ئینگلیزییەکە دەدات.

کەین لە ساڵی رابردوودا پەیوەندی بە میونشن کرد، بەگوێرەی رێککەوتنی نێوان کەین و میونشن، ئەوا لە 31ی یەنایەر/کانوونی دووەمی داهاتوودا، مەرجی هەڵوەشاندنەوەی گرێبەستی کەین کە بریتییە لە 65 ملیۆن یۆرۆ چالاک دەبێت.

بەگوێرەی زانیارییەکانی رۆژنامە ئەڵمانییەکە، کەین لە میونشن دڵخۆشە و ئێستا بیر لە مێرکاتۆ ناکاتەوە، چونکە یاریزانەکە پێیوایە، میونشن پڕۆژەیەکی گەورەی هەیە و دەتوانێت نازناوی گەورە بباتەوە.

گرێبەستی ئێستای کەین لە هاوینی ساڵی 2027 بەسەردەچێت، میونشن دەیەوێت گرێبەستی هێرشبەری پێشووی تۆتنهام بۆ دوو ساڵی دیکەش نوێبکاتەوە، بەڵام تاوەکو ئێستا هیچ هەنگاوێکی فەرمی نەنراوە.

بارسێلۆنا چاودێری دەکات

بارسێلۆنا لە نزیکەوە چاودێری دۆخی کەین دەکات، رۆژنامەکە دووپاتیدەکاتەوە، گفتوگۆی سەرەتایی لە نێوان هەردوولا کراوە، تاوەکو زانیاری لەبارەی دۆخی یاریزانەکە و نیازی لە میونشن بزانن.

بارسا دەیەوێت سیناریۆی گواستنەوەی رۆبێرت لیڤاندۆڤسکی لە میونشنەوە بۆ بارسێلۆنا دووبارە بکاتەوە. ئەو فاکتەرەی هاوکاری بارسا دەکات، بریتییە لە ماوەی گرێبەستی کەین.

سیاسەتی بارسا هاوشێوەی میونشن نییە، چونکە بارسا سیستمی خۆی لەگەڵ یاریزانی بەتەمەن راهێناوە، بەڵام سیاسەتی میونشن تەواو جیاوازە، ئەمەش رێگە بۆ چوونە دەرەوەی کەین خۆشدەکات.

پلان B بارسا چییە؟

لە ئەگەری سەرنەگرتنی گواستنەوەی کەین بۆ بارسێلۆنا، یانە کاتالوونییەکە چەندین بژاردەی دیکەی هەیە؛

• خولیان ئالڤارێز، هێرشبەری ئاتلێتیکۆ مەدرید: هێرشبەرە ئەرجەنتینییەکە، یەکێکە لە دیارترین هێرشبەرانی ئێستای ئەوروپا، بەڵام بەهاکەی لە 150 ملیۆن یۆرۆ کەمتر نییە، ئەمەش پارەیەکی گەورەیە بۆ گەنجینەی بارسا.
• ئیتا ئیۆنگ، هێرشبەری لێڤانتێ: یەکێکە لە بژاردەکان و بەهاکەی بەراورد بە بژاردەکانی دیکە زۆر کەمە.