یاریگا –
دوای به‌رێوه‌چوونی چوار گه‌ڕ له خولی نایابی كوردستان ناوبژیوانان بڕیاری بایكۆتیانداوه چاره‌نووسی به‌رێوه‌چوونی گه‌ری پێنجه‌می خوله‌كه دیارنیه.
بەگوێرەی ئەو زانیارییە تایبەتانەی دەست یاریگا کەوتووە، خولی نایابی تۆپی پێی کوردستان رووبەڕووی مەترسییەکی گەورە بووەتەوە و ئەگەری راگرتنی خولەکە لە ئارادایە، ئەمەش دوای ئەوە دێت کە ناوبژیوانانی كه‌ركوك، دهۆک و سلێمانی بڕیارێکی یەکلاییکەرەوە و چارەنووسساز‌یان داوە بۆ بایکۆتکردنی یارییەکان.
كێشه‌ی دارایی و دوو ساڵ چاوەڕوانی
هۆکاری سەرەکی ئەم هەڵوێستە توندەی ناوبژیوانان دەگەڕێتەوە بۆ وەرنەگرتنی شایستە داراییەکانیان، بەپێی زانیارییەکان، ماوەی زیاتر لە دوو ساڵە ناوبژیوانانی کوردستان هیچ بڕە پارەیەکیان وەک کرێی بەڕێوەبردنی یارییەکان وەرنەگرتووە، ئەم دواکەوتنە زۆرە وایکردووە کە دۆخەکە لە کۆنترۆڵ دەربچێت و ناوبژیوانان چیتر ئامادە نین بەبێ بەرامبەر ئەرکەکانیان ڕاپەڕێنن.
مێژوویەک لە ناڕەزایەتی؛ سیناریۆکەی وەرزی رابردوو
ئەمە یەکەمجار نییە کە کێشەی دارایی دەبێتە هۆی بایكۆتی ناوبژیوانه‌كان لە وەرزی رابردوو، ناوبژیوانانی سلێمانی وەک دەربڕینی ناڕەزایەتی، بایکۆتی بەڕێوەبردنی یارییەکانیان کرد و تاوه‌كو کۆتایی وەرزەکە نەگەڕانەوە بۆ یاریگاکان، بەڵام جیاوازییەکە لەم وەرزەدا ئەوەیە کە ناڕەزایەتییەکە فراوانتر بووە و هەرسێ پارێزگای هەولێر، دهۆک و سلێمانی گرتووەتەوە، کە ئەمەش فشارێکی گەورە دەخاتە سەر یەکێتیی تۆپی پێی کوردستان.
هەڵوێستی ئەمجارە: پارە نەبێت، فیكه لێدان نییە
سەرچاوەکان ئاماژە بەوە دەکەن کە هەڵوێستی ئەمجارەی ناوبژیوانان زۆر لە جارەکانی پێشوو توندترە، ئەوان بڕیاریان داوە بەهیچ شێوەیەک پاشەکشە نەکەن و نەگەڕێنەوە بۆ یاریگاکان تاوه‌كو ئەو کاتەی تەواوی شایستە داراییە کەڵەکەبووەکانیان بۆ خەرج دەکرێت، ئەمەش پەیامێکی روونە بۆ لایەنە پەیوەندیدارەکان کە بەڵێنی زارەکی چیتر کێشەکە چارەسەر ناکات.
چارەنووسی گەڕی پێنجەم نادیاره
تاوه‌كو ئێستا چوار گەڕ لە خولی نایابی کوردستان بەڕێوەچووە، بەڵام بەهۆی ئەم بایکۆتە سەرتاسەرییەوە، مەترسییەکی راستەقینە لەسەر بەڕێوەچوونی گەڕی پێنجەم دروست بووە، ئەگەر لە ماوەی داهاتوودا چارەسەرێکی خێرا نەدۆزرێتەوە، ئەوا گەڕی پێنجەم ناكرێت و خولەکە تووشی وەستان دەبێت.
