دڵنیابن دەکرێت؛ پەیامێک لە یانەی زاخۆ بۆ هاندەران

یاریگا –

بۆ میوانداریکردنی یانەی عەین فیدراسیۆنی کەنداو چه‌ند داواکاریی بەپەلەی ئاراستەی زاخۆ کردووه.

لە کاتێکدا یانەی زاخۆ خۆی بۆ یارییەکی چارەنووسساز بەرامبەر یانەی عەینی ئیماراتی لە جامی یانه‌كانی کەنداو ئامادە دەکات، فیدراسیۆنی کەنداو تەنها سێ ڕۆژ مۆڵەتی داوەتە یانەکە بۆ جێبەجێکردنی چەند داواکارییەک، بۆ ئه‌وی بڕیاری كۆتایی بده‌ن یارییه‌كه‌ی زاخۆ و عه‌ین له‌ زاخۆ بكرێت.

یانەی زاخۆ، کە لە یەکەم یاریی خۆیدا لەم پاڵەوانێتییەدا بەهۆی ئامادەنەبوونی یاریگاكه‌ی، یارییەکەی لە دهۆک كرد، ئێستا  فشاری له‌سه‌ره‌‌ بۆ ئەوەی لە یاریی داهاتوودا لە بەردەم هاندەرانی خۆی و لە یاریگای نێودەوڵەتیی زاخۆ میوانداریی یانەی عەینی ئیماراتی بکات. یارییەکە بڕیارە لە 4ـی مانگی داهاتوو بەڕێوەبچێت.

داواکارییەكانی فیدراسیۆنی کەنداو له‌ زاخۆ

بۆ ئەوەی یاریگای زاخۆ بە فەرمی مۆڵەتی بەڕێوەچوونی یارییەکەی پێ بدرێت، فیدراسیۆنی کەنداو چوار داواکاریی سەرەکیی ئاراستەی کارگێڕیی یانەی زاخۆ کردووە و داوای کردووە لە ماوەی سێ (٣) ڕۆژدا جێبەجێ بکرێن:

1. زیادکردنی ڕووناکیی یاریگا: پێویستە ڕووناکیی یاریگاکە بەهێزتر بکرێت و بگاتە ئەو ئاستەی کە لەلایەن فیدراسیۆنەوە داوا کراوە.
2. پاککردنەوەی دەوروبەری یاریگا: دەبێت دەوروبەری یاریگاکە بە تەواوی پاک بکرێتەوە و هیچ شتێکی زیادەی لێ نەمێنێت.
3. ڕێگریکردن لە هاتنە ژوورەوەی یاریزانان: پێویستە ڕێوشوێنی توند بگیرێتەبەر بۆ ئەوەی یاریزانان بەبێ ئەرکی فەرمی نەتوانن بچنه‌ ژوورەوە.
4. دانانی فلێکسی تایبەت بە یاریگا: پێویستە یاریگاکە بە فلێکس و ڕیکلامی تایبەت بە پاڵەوانێتییەکە بڕازێنرێتەوە.

دڵژار عەدنان: “کێشەکان گەورە نین و یارییەکە لە زاخۆ دەکرێت”

سەبارەت بەم داواکارییانە، دڵژار عەدنان، ئەندامی دەستەی کارگێڕیی یانەی زاخۆ، لە لێدوانێکی تایبەتدا بۆ تۆڕی وەرزشیی یاریگا، هاندەرانی یانەکەی دڵنیا کردەوە و رایگەیاند:

“هیچ کێشەیەکی گەورە لە ئارادا نییە، ئێمە خەریکی جێبەجێکردنی ئەو داواکارییانەین، هاندەران دڵنیا دەکەینەوە کە یارییەکە 100٪ لە زاخۆ ده‌كرێت و هیچ کێشەیەکی گەورەمان نییە.”

ئەم لێدوانە دڵنیایی دەداتە هاندەرانی زاخۆ کە دەتوانن لە یارییەکی مێژوویی و گرنگدا، لەنێو یاریگای خۆیاندا پاڵپشتیی تیمەکەیان بکەن. کارگێڕیی یانەی زاخۆ به‌لێنی داوه‌ له‌ زووترین كات و پێش واده‌ی خۆی  سەرجەم کارەکان ته‌واو بكات تا یاریگاکەیان بە جوانترین شێوە و بەپێی ستانداردە نێودەوڵەتییەکان پێشوازی لە پاڵەوانێتییەکە بکات.