یاریگا –
راهێنەری نەورۆز دەڵێت هیوادارم کێشەی دارایی یانەکە کاریگەری لەسەر ئاستی یاریزانەکان دروست نەکات بەرامبەر دهۆک.
شەممە ( 25ـی ئۆکتۆبەری 2025 ) لە گەڕی پێنجەمی خولی ئەستێرەکانی عێڕاق، نەورۆز لە یاریگای خۆی کاتژمێر 8:30ـی شەو رووبەڕووی دهۆک دەبێتەوە، نەورۆز بە کێشەیەکی دارایی قوڵ تێپەڕ دەبێت و راهێنەری تیپەکەش هیوا خوازە کاریگەری لەسەر یاریزانان دروست نەکات.
یاسین ئاراس، راهێنەری نەورۆز لە کۆنگرەی رۆژنامەوانی دەربارەی ئامادەکاری تیپەکەی رایگەیاند:
ئەنجامەکانمان لە رابردوو خراپ بوونە، دەستمان لە سەر هەڵەکان داناوە و دەستنیشانمان کردووە، کارمان کردووە تاوەکو بگەینە رێچکەیەکی راست، بەڵێ کێشەی داراییمان هەیە لە یانەکە و هیوادارم کاریگەری لەسەر یاریزانەکان نەبێت، چونکە بەرامبەر دهۆک بۆ سێ خاڵی یارییەکە یاریی دەکەین.
ئاسۆ رۆستەم، هێرشبەر و ئەستێرەی یانەی نەورۆز دەربارەی ئامادەکارییان بۆ یاریی بەرامبەر دهۆک گووتی:
لە کاتی وەستانی خول کاری باشمان کردووە و دەمانەوێت لە نێو یاریگا پلانەکان بە تەواوی جێبەجێ بکەین، دڵخۆشین جارێکی دیکە لەبەردەم هاندەرانمان یاریی دەکەین، سەرجەم یاریزانەکان ئامادەن و باوەڕی تەواومان بەخۆمان هەیە ئاست و ئەنجامێکی باش بەدەست بهێنین.
دوای نۆژەنکردنەوەی یاریگاکەیان، نەورۆز یەکەم یارییە لە خولی ئەستێرەکانی عێڕاق لە یاریگای خۆی دەیکات، نەورۆز لە چوار یاریی رابردوودا سەرکەوتنێک و سێ شکستی هەیە و بە سێ خاڵ لە ریزبەندی 14دێت.
