یاریگا –
یاریگا –
جود بێلینگهامی ئینگلیزی، ئەستێرەی هێڵی ناوەندی ریاڵ مەدرید، ئامادەیی تەواوی خۆی بۆ یاریی کلاسیکۆ نیشاندا و جەختی لەوە کردەوە ئه‌و یارییه یەکێکە لە گەورەترین ڕووبەڕووبوونەوەکانی جیهانی تۆپی پێ.
لە لێدوانێکیدا بۆ كه‌ناڵی یانەی ڕیاڵ مەدرید، بێلینگهام گوتی،
“کلاسیکۆ یەکێکە لە گەورەترین یارییەکانی جیهان، لە منداڵییەوە سەیری هەموو یارییەکانم کردووە، ئێستا لە هەندێکیاندا یاریم کردووە.”
گوتیشی،
“لە کلاسیکۆدا ساتەکانم خۆش و هەندێکی تری قورسم هەبووە، بەڵام یارییەکی نایابە، بەتایبەت کاتێک لە یاریگای خۆمان یاریی ده‌كه‌ین. ئەم هەفتانە زۆر سه‌رنجراكێش ده‌بن، دەمانەوێت پارێزگاری لەو ڕیتمە ئەرێنییە بکەین کە لە چەند یاریی ڕابردوودا بەدەستمان هێناوە.”
🎙️ @BellinghamJude: “Estoy fuerte y positivo; en mi mejor estado físico desde hace tiempo”.
La entrevista completa en RM Play. pic.twitter.com/4wrvo96hRx— Real Madrid C.F. (@realmadrid) October 24, 2025
یاریزانه ئینگلیزیه‌كه باسی له‌وه‌شكرد،
“هەمووان دەزانن کە بردنەوە و گۆڵ تۆمارکردن لەم جۆرە یارییانەدا گرنگییەکی زۆری هەیە، ئەمە یارییەکە کە لە ڕووی دەروونی و هزریه‌وه بۆ تەواوی وەرزەکە ئامادەت دەکات. دەزانیت کە بردنەوە لە گەورەترین ڕکابەرت متمانەیەکی زۆرت پێدەبەخشێت و دەمانەوێت جارێکی تر هەست بەوە بکەینەوە.”
دەربارەی کەشی یاریگای سانتیاگۆ بێرنابیۆ، بێلینگهام گوتی،
“هیچ شوێنێک لەم یاریگایە باشتر نییە بۆ به‌رێوه‌چوونی یارییەکی گەورە. چەندین جار ئەمەم ئەزموون کردووە، بەڵام هەرگیز ناتوانیت لەگەڵی ڕابێیت. لە هەر یارییەکدا کە دێیتە ناو یاریگا، هەست بە ترس و شکۆمەندی دەکەیت.”
یاریزانه‌كه به‌ردوام بوو له قسه‌كانی و باسی كه‌شی یاریگای سانتیاگۆی كرد،
“کاتێک تیفۆکە بەرز دەکرێتەوە و گوێت لە هاواری هاندەران دەبێت، دەزانیت کە لەبەردەم شەوەکی گەورەدایت. هیوادارم بتوانین وەڵامی ئەو حەماسەتە بدەینەوە کە هاندەران پێمانی دەبەخشن.”
دەربارەی دۆخی جەستەیی خۆی پێش یارییەکە، وەڵامی دایەوە،
“هەست دەکەم لە دۆخێکی باشدام و دڵخۆشییەکی زۆر دامدەگرێت.”
ئەستێرە ئینگلیزییەکە درێژەی بە قسەکانیدا،
“ماوەیەکی زۆرە لە باشترین دۆخی جەستەیی خۆمدام، ئامادەم بۆ بەشداریکردن و پێشکەشکردنی هەر شتێک کە پێویست بێت بۆ بردنەوەی ڕیاڵ مەدرید، هیوادارم بتوانم بەردەوام بم لەسەر یاریکردنی باش و چێژ لە کاتەکانم وەربگرم و بردنەوە بەدەستبهێنم.”
دەربارەی کلیلی بردنەوەی کلاسیکۆ رایگه‌یاند ،
“ئەوەی گرنگە، بەڕێوەبردنی یارییەکە و هەستەکانە، هەندێک وردەکاریی بچووک جیاوازی دروست دەکەن، وەرزی ڕابردوو لە هەندێک یارییدا دواکەوتین و لە دەستمان دەرچوون، بابەتەکە پەیوەندی بە پاراستنی ئارامیی ده‌روونیه‌وه هەیە.”
گوتیشی
“دەزانین چۆن یاری دەکەن و دەشزانین چۆن دەمانەوێت یاری بکەین. نهێنییەکە لەوەدایە کە بتوانیت بە باشی ته‌واوی یارییەکە بەڕێوەببەیت، بەتایبەت لە لایەنی زەینییەوە، و چۆن مامەڵە لەگەڵ فشار و کەشوهەواکەدا دەکەیت. ئەمانە ئەو وردەکارییانەن کە جیاوازی دروست دەکەن.”
له كۆتاییدا دەربارەی بەهای ئەم یارییە لە ئینگلتەرا بێلینگهام گوتی، هەمووان لە گرنگی ئەم یارییە تێدەگەن، لەوێ چەندین یاریی کلاسیکۆ و دێربی گەورە هەن، بەڵام سەرەڕای ئەوەش، لە مانای ئەم یارییە تێدەگەن.
