زاخۆ لە بەحرەین رووبەڕووی سیترە دەبێتەوە

یاریگا –

زاخۆ لە دەرەوەی یاریگای خۆی رووبەڕووی سیترەی بەحرێنی دەبێتەوە، راهێنەری تیپەکەش دەڵێت یارییەکە بۆ زاخۆ ئاسان نابێت.

لە گەڕی دووەمی خولی یانە پاڵەوانەکانی کەنداو، چوارشەممە ( 22ـی ئۆکتۆبەری 2025 ) زاخۆ لە بەحرەین کاتژمێر 6ـی ئێوارە لە یاریگای خەلیفەی نێودەوڵەتی رووبەڕووی سیترەی ئەو وڵاتە دەبێتەوە، تەواوی یاریزانانی زاخۆ بۆ یارییەکە ئامادەن و هیچ پێکانێک یاخۆد راگیرانێکی نیە.

ویسام رزق، راهێنەری زاخۆ باسی ئامادەکاری تیپەکە دەکات و یارییەکەش بە زەحمەت ناو دەبات، ویسام دەربارەی یارییەکە گووتی:

بە دڵنیاییەوە یارییەکی زەحمەت چاوەڕێمان دەکات، چونکە سیترە لە یاریی یەکەم شکستی هێناوە و هێزی بۆ ئەم یارییە کۆکردۆتەوە، یارییەکەش لە دەرەوەی یاریگای خۆمانە کە ئەمەش ئەرکمان قورستر دەکات،  بەڵام ئێمە ئامادەین بۆ بەدەست هێنانی سێ خاڵەکە، یاریزانەکانیش لەوپەڕی ئامادەباشیدان و دەمانەوێت دڵی هاندەرانمان خۆش بکەین.

زاخۆ لە یاریی یەکەم سەرکەوتنی بەرامبەر قادسیە تۆمار کرد و بە سێ خاڵ لە ریزبەندی دووەم دێت، عەینی ئیماڕاتی دوای بردنەوەی لە سیترە بە ئەنجامی 4 _ 1 بە هەمان خاڵ لە ریزبەندی یەکەمی کۆمەڵەی یەکەم دێت، لە 4ـی مانگی داهاتووش زاخۆ لە یاریگای خۆی میوانداری عەین دەکات.