یاریگا –
دێکۆ، بەڕێوبەری وەرزشی بارسێلۆنا، ئاشکرای کرد لە زستاندا هیچ گرێبەستێکی نوێ واژۆ ناکەن.
دێکۆ، لە چاوپێکەوتنێکدا لەگەڵ رادیۆی کادینا سێر و دواتریش لە لێدوانەکانیدا لە کۆبوونەوەی فەرمی ئەندامانی یانەکەدا وێنەیەکی روونی لە دۆخی ئێستا و پلانەکانی داهاتووی بلاوگرانا خستەڕوو.
دێکۆ بە روونی ئەوەی خستەڕوو کە بارسێلۆنا لە گواستنەوەی زستانەدا هیچ گرێبەستێکی نوێ واژۆ ناکات و لەوبارەیەوە دەڵێت:
لە هاویندا ئەوەی ویستمان و لە تواناماندا بوو کردمان، ئێستا تەنیا دەبێت کار لەسەر چارەسەر و گەڕانەوەی یاریزانە پێکراوەکان بکەین، گواستنەوەی یاریزانی نوێ لە پلانماندا نییە.
🚨🔵🔴 Barça director Deco: “We did everything we wanted and could in the summer transfer market”.
“We have many players to recover. Signing in the winter market is not in our plans”, told SER. pic.twitter.com/O0VVnSoxFr
— Fabrizio Romano (@FabrizioRomano) October 19, 2025
لە درێژەی قسەکانیدا سەبارەت بە متمانەیان بە لاماسیا گوتی:
بارسێلۆنا پاڵپشتی تەواوی فلیک دەکات و باوەڕی بە لاماسیا هەیە.
دێکۆ هەروەها بەرگری لە فلیک کرد و رەخنەی لە ناوبژیوانی لالیگا گرت و گوتی:
کاتێک بارسا بەشدارە، هەمیشە بردنەوە قورسترە، ئێمە نامانەوێت بیانوو بهێنینەوە، بەڵام هەندێک بڕیار بەڕاستی دژی ئێمە بووە، کرانە دەرەوەی فلیک بەرامبەر جیرۆنا قبوڵکراو نەبوو و بە دڵنیاییەوە یانەکە ناڕەزایەتی دەردەبڕێت.
ئەم قسانە لەکاتێکدایە کە تیپەکەی هانزی فلیک دوای دوو شکستی یەک لەدوای یەک و بردنەوەیەکی سەخت لە جیرۆنا بە ئەنجامی 2-1 هێشتا لە قەیراندایە، زۆرێک پێشبینیان دەکرد یانەکە لە مانگی یەکدا بۆ بنیاتنانەوەی پێکهاتەکەی هەنگاوی نوێ بنێت و ئەستێرەیەک بگوازێتەوە بەڵام بەڕێوبەری وەرزسی یانەکە ئەم دەنگۆیانەی رەت کردەوە.
