دوایین زانیاری لەبارەی پێکانەکەی کۆرتوا ئاشکرا دەکرێت

یاریگا –

چارەنووسی تیبۆ کۆرتوا، گۆڵپارێزی ریال مەدرید بۆ یارییەکی بەرامبەر بارسێلۆنا یەکلاییدەکرێتەوە.

شەوی رابردوو لە یارییەکانی گەڕی نۆیەمی لالیگا، ریال مەدرید بە گۆڵێکی بێبەرامبەر لە خێتافی بردەوە و پارێزگاری لە پێشەنگی ریزبەندی لالیگا کرد.

لە کۆتا خولەکی یارییەکە تیبۆ کۆرتوا ریال مەدریدی لە گۆڵی یەکسانبوون رزگارکرد، بەڵام لەکاتی گەڕاندنەوەی تۆپەکە ئازار بە ئەژنۆی گەیشت و چەند خولەکێک یارییەکە وەستا.

دوای یارییەکە چابی ئاڵۆنسۆ راهێنەری ریال مەدرید رایگەیاند، کۆرتوا باشە و مەترسی لەسەر نییە، هاوکات رادیۆی کادینا سێر ئاشکرایکردووە، گۆڵپارێزە بەلجیکییەکە بۆ کلاسیکۆ ئامادە دەبێت و مەترسی دوورکەوتنەوەی لەسەر نییە.

هەر بەگوێرەی هەمان سەرچاوە، ماسوولکەی دەیڤد ئالابا تووشی پێکان بووە، ئەمڕۆ دووشەممە پشکنینی پزیشکی بۆ دەکرێت و ماوەی دوورکەوتنەوەی ئاشکرا دەکرێت.

کۆرتوا دوای یارییەکە لە ئینستاگرام؛

هەرگیز ئاسان نییە لەناو یاریگای خێتافی سەرکەوتن بەدەستبهێنیت، بەڵام تیپەکەمان دەیزانی چۆن چاوەڕوانی ساتی گونجاو بکات بۆ بەدەستهێنانی سێ خاڵی یارییەکە و پاراستنی تۆڕی گۆڵەکەشمان بەخاوێنی.

ریال مەدرید لە 22ـی ئەم مانگە لە یارییەکانی چامپیۆنزلیگ میوانداری یوڤێنتوس دەکات، هەر لە 26ـی هەمان مانگ لە کلاسیکۆی زەوی میوانداری بارسێلۆنا دەکات.