یاریگا –
مێمفێس دێپای، گۆڵکاری مێژوویی هەڵبژاردەی هۆڵەندا بەشداری لە یاریی داهاتووی هەڵبژاردەکەی بەرامبەر ماڵتا ناکات کە بڕیارە پێنجشەممە بکرێت.
دێپای لە بەڕازیل یاریی بۆ کۆرینتیانز دەکات و بەر لە گەشتەکەی، پاسپۆرتەکەی لێدزراوە و گەشتەکەی دوادەکەوێت.
دێپای تەمەن 31 ساڵ لە ماوەی رابردوودا ژمارەی پێوانەیی رۆبن ڤان پێرسی شکاند و بە 52 گۆڵ بووە گۆڵکاری مێژوویی هۆڵەندا.
بڕیاربوو دوێنێ دووشەممە دێپای بگاتە ئەمستردام، پایتەختی هۆڵەندا، بەڵام بەهۆی دزرانی پاسپۆرتەکەی، وادەی گەشتەکەی دواخرا.
دێپای نەیتوانی پاسپۆرتەکەی بدۆزێتەوە و بەبێ پاسپۆرت چووە فڕۆکەخانە، بەڵام بەرپرسانی فڕۆکەخانە رێگەی گەشتکردنیان نەدا.
بریارە ئەمڕۆ سێشەممە دێپای بگاتە ئەمستردام و رۆناڵد کۆمان بڕیاری سزادانی بۆ دەرنەکردووە.
هۆڵەندا لە چوار یاریی پاڵاوتنی مۆندیالی 2026 خاوەنی 10 خاڵە و بەبردنەوەی یارییەکەی ماڵتا، هاوکێشەکە زۆر یەکلاییدەکاتەوە.
هەینی داهاتوو هۆڵەندا میوانداری فینلاند دەکات و پێدەچێت دێپای بەشداری یارییەکە بکات.
