ئێرلینگ هالاند ژمارەیەكی مێژووی چامپیۆنزلیگی بەناوی خۆی كرد

یاریگا –

ئێرلینگ هالاند، ئەستێرەی نەرویجی یانەی مانچێستەر سیتی ئینگلیزی ژمارەیەكی مێژووی چامپیۆنزلیگی بە ناوی خۆیەوە كرد.

شەوی رابردوو مانچێستەر سیتی لە یاریگای ئیتیحادی تایبەت بە خۆی میوانداری ناپۆلی كرد و یارییەكەشی بە ئەنجامی دوو گۆڵی بێ وەڵام لێبردەوە، لە میانی یارییەكانی گەڕی یەكەمی قۆناخی خول – چامپیۆنزلیگ.

لە خولەكی 21 گێمی یەكەمدا جیۆڤانی دی لۆرێنزۆ بە كارتی سوور كرایە دەرەوەی یاریگا و ناپۆلی بە 10 یاریزانەوە یارییاندەكرد. لە دوای ئەوە یانە ئیتاڵییەكە بە شێوازی بەرگرییەكی چڕ یارییاندەكرد.

گۆڵی یەكەمی سیتیزن ئێرلینگ هالاند لە خولەكی 56ی یارییەكەدا كردی و بەوەش بوو بە خێراترین یاریزان گەیشتبێتە گۆڵی ژمارە 50 لە خولی یانە پاڵەوانەكانی ئەوروپا.

ئێرلێنگ هالاند تەنیا پێوویستی بە 49 یاریی بوو تاوەكو بگاتە گۆڵی ژمارە 50 ی خۆی لە خولی یانە پاڵەوانەكانی ئەوروپا.

هەروەها لەدوای مێسی هالاند دووەم یاریزانە كە بە تەمەنێكی كەم بگاتە گۆڵی ژمارە 50لە چامپیۆنزلیگ.