یاریگا –
بارسێلۆنا بڕیاری کۆتاییدا و چارەنووسی یارییەکەی بەرامبەر پاریس سانجێرمانی لە چامپیۆنزلیگ یەکلاییکردەوە.
پلاتفۆڕمی خیخانتێس بڵاویکردووەتەوە، ئامادەکارییەکان لە یاریگای مۆنجویک بۆ میوانداریکردنی یارییەکەی پاریس سانجێرمان لە گەڕی دووەمی چامپیۆنزلیگ دەستیپێکردووە.
بەگوێرەی زانیارییەکانی خیخانتێس، ئەمڕۆ چیمەنی نوێ دەگاتە یاریگای مۆنجویک و یاریی داهاتووی بارسا و پاریس لەو یاریگایە دەکرێت.
بارسێلۆنا بەهۆکاری جیاواز نەیتوانیوە پڕۆسەی نۆژەنکردنەوە و فراوانکردنی یاریگای کامپ نۆ لە کاتی خۆیدا تەواو بکات.
تاوەکو ئێستا هیچ وادەیەکی دیارییکراو بۆ بەڕێوەچوونی یارییەکانی بارسا لە کامپ نۆ دیاریینەکراوە، بەڵام لەوانەیە لە ناوەڕاستی مانگی داهاتوو، جارێکی دیکە ببێتەوە هێلانەی بارسا.
