مانچێستەر یونایتد دوا هەوڵی خۆی بۆ گۆڵپارێزێک دەدات

یاریگا –

مانچێستەر یونایتد لە هەوڵەکانی بۆ دۆزینەوەی گۆڵپارێزێکی نوێ نەوەستاوە.

کەمتر لە دوو رۆژ بۆ داخستنی دەرگای گواستەوەکان ماوە و مانچێستەر یونایتد بە نیازە ئێمیلیانۆ مارتینێز، گۆڵپارێزی ئاستۆن ڤیلا بگوازێتەوە.

فابریزیۆ رۆمانۆ، رۆژنامەنووسی دیاری مێرکاتۆ بڵاویکردووەتەوە، لە چەند رۆژی رابردوودا، مان یونایتد پەیوەندی راستەوخۆی لەگەڵ مارتینێز و ئاستۆن ڤیلا هەبووە و باسیان لە ئەگەرەکانی گواستنەوەی یاریزانەکە بەر لە دوا رۆژی گواستنەوەکان کرد.

مارتینێز وەرزی نوێی بەشێوەیەکی ئاسایی لەگەڵ ئاستۆن ڤیلا دەستپێکردووە، سەرەڕای ئەوەی لە کۆتایی وەرزی رابردوو، ماڵئاوایی لە هاندەرانی ڤیلانز کرد و ئەوکاتە باس لە چوونە دەرەوەی دەکرا.

لەلایەکی دیکەوە، مان یونایتد خەریکی گفتوگۆی چڕە لەگەڵ یانەی رۆیاڵ ئانڤیرپ، تاوەکو بە دەستبەرداربوون لە سێنێ لامێنس، گۆڵپارێز رازیبکات، بەڵام ئەمە نەبووەتە هۆکاری پچڕاندنی گفتوگۆکان لەگەڵ مارتینێز.

مارتینێز یەکێکە لە باشترین گۆڵپارێزانی جیهان و تاکە گۆڵپارێزە دووجار خەڵاتی یاشین بۆ باشترین بباتەوە.