یاریگا –
ئارنە سڵۆت، راهێنەری لیڤەرپوول شوێنگرەوەی ترێنت ئالێکساندەر ئارنۆڵدی دەستنیشانکرد.
ئارنۆڵد جێگری کاپتنی یەکەمی لیڤەرپوول بوو، بەڵام دوای پەیوەندی بە ریال مەدرید، سڵۆت دوێنێ هەینی بڕیاری شوێنگرەوەیدا.
ئاندرو رۆبێرتسن، بەرگریکاری باڵی چەپ کرایە کاپتنی دووەم و لە ئەگەری ئامادەنەبوونی ڤیرجیڵ ڤان دایک، رۆبێرتسن دەبێتە کاپتن.
سڵۆت لەبارەی دەستنیشانکردنی رۆبێرتسن دەڵێت؛
چەندین ساڵە لێرە یاریی دەکات، دووجار پرێمەرلیگی بردووەتەوە. وەرزی رابردوو ڤان دایک، ترێنت، رۆبێرتسن و محەمەد سەڵاح بوون، بۆیە ئێستا شتێکی لۆجیکییە رۆبۆ ببێتە کاپتنی دووەم.
جیا لە کوالیتی یاریزانەکە، رۆبێرتسن بەشێکە لە کولتووری لیڤەرپوول و ئەمە یەکێکە لە گەورەترین دیارییەکانی یورگن کڵۆپ کە بۆ منی جێهێشتووە.
رۆبێرتسن تاوەکو ئێستا 344 یاریی بۆ لیڤەرپوول کردووە، دوای ئەوەی لە هاوینی ساڵی 2017 بەبڕی 10 ملیۆن پاوەند لە هاڵ سیتییەوە چووە ئانفیڵد.
رۆبۆ دوو پرێمەرلیگ، چامپیۆنزلیگ، مۆندیالی یانەکان، جامی یەکێتیی ئینگلتەرا، جامی کاراباو (دووجار) و جامی سوپەری ئەوروپای بەدەستهێناوە.
لەم وەرزەدا رۆبێرتسن بووەتە یاریزانی یەدەکەی میلۆش کێرکێز، کە بەبڕی 40 ملیۆن پاوەند لە بۆرنمسەوە پەیوەندی بە رێدز کرد.
