تەواو؛ مانچێستەر یونایتد یەكەم ئۆفەری فەرمی بۆ گواستنەوەی شێشكۆ پێشكەش دەكات
یاریگا –
كێبڕكێیەكانی گواستنەوەی بێنیامین شێشكۆ ئەستێرەی سلۆڤینی یانەی لایپزیگی ئەڵمانی بەردەوامە.
هەرچەندە لە سەرەتای مێرکاتۆی ئەم هاوینە، ناوی شێشکۆ بەردەوام بە چەند یانەیەکی پرێمەرلیگ دەبەسترایەوە و لەسەرووی هەموویانەوە ئارسیناڵ، بەڵام دواتر یانە لەندەنییەکە ئامانجی خۆی یەکلاییکردەوە و لە کۆتاییدا ڤیکتۆر یۆکێرێشی لە سپۆڕتینگ لیسبۆن گواستەوە.
ئێستا شێشکۆ بووەتە ئامانجی سەرەکی مانچێستەر یونایتد و نیوکاسڵ یونایتد. هەرچەندە نیوکاسڵ هەنگاوی فەرمیشی ناوە، بەڵام تاوەکو ئێستا لایپزیگ وەڵامی ماگپایسی نەداوەتەوە.
🚨 BREAKING: Manchester United make offer to RB Leipzig for Benjamin Sesko. Proposal €75m + €10m – reflects #MUFC valuation of 22yo & they believe striker favours Old Trafford. No reply yet from #RBLeipzig. #NUFC also working to close deal @TheAthleticFC https://t.co/5O8AT6Alej
— David Ornstein (@David_Ornstein) August 5, 2025
بەگوێرەی زانیارییەكانی دەیڤد ئۆرنشتاین لە تۆڕی ئاتلێتیک، مانچێستەر یونایتد بەفەرمی چووەتە نێو كێبڕكێی گواستنەوەی بێنیامین شێشكۆ.
مانچێستەر یونایتد ئۆفەرێكی بە بەهای 75 ملیۆن یۆرۆی جێگیر و 10 ملیۆن یۆرۆی زیادكراو بۆ بەدەستهێنانی تواناكانی شێشكۆ پێشكەشی لایپزیگ كردووە.
پێشتر لایپزیگ ئۆفەرێكی نیوكاسڵی بە بەهای 75 ملیۆن یۆرۆ و 5 ملیۆن گۆڕانكاری بۆ دەستبەرداربوون لە شێشكۆ رەتكردەوە.
بێنیامین شێشكۆ لە هاوینی 2023 لە ریزەكانی سالزبۆرگەوە بە بەهای 24 ملیۆن یۆرۆ پەیوەندی بە لایپزیگەوە كرد و بەهای ئێستای یاریزانەكە 70 ملیۆن یۆرۆیە.
شێشكۆ لەگەڵ لایپزیگ بەشداری 87 یارییكردووە و توانیویەتی 39 گۆڵ بكات و 8 گۆڵیش درووست بكات.
