هەموو شتێک بزانە؛ شێوازی قۆناخی پلەی ئۆفی هەڵبژاردەكانی ئاسیا بۆ گەیشتن بە مۆندیال چۆنە؟
یاریگا –
قۆناخی سێیەمی پاڵاوتنەكانی كیشوەری ئاسیا بۆ گەیشتن بە جامی جیهانی كۆتاییهات و شەش هەڵبژاردە راستەوخۆ گەیشتنیان بە مۆندیالی 2026 مسۆگەر كرد.
هەریەک لە هەڵبژاردەكانی ئێران، ئوزبەكستان، كۆریای باشوور، ئوردن، ژاپۆن و ئوسترالیا راستەوخۆ گەیشتنە یارییەكانی جامی جیهانی 2026.
🇰🇷✅ Korea Republic finishes #FIFAWorldCup qualifying with an undefeated record!#WeAre26 pic.twitter.com/pZLQM2cDnd
— FIFA World Cup (@FIFAWorldCup) June 10, 2025
لە مۆندیالی 2026 كیشوەری ئاسیا شەش كورسی راستەوخۆی هەیە و شەش هەڵبژاردەی كیشوەرەكە دەگەنە یارییەكانی مۆندیالی داهاتوو.
شەش هەڵبژاردە گەیشتوونەتە قۆناخی پاشكۆی كیشوەری ئاسیا و ئەو شەش هەڵبژاردەیە دابەشی دوو كۆمەڵە دەبن، هەر كۆمەڵەیەک سێ هەڵبژاردە لە خۆ دەگرێت، یەكەمی هەردوو كۆمەڵەكە راستەوخۆ دەگاتە مۆندیالی 2026.
هەریەک لە هەڵبژاردەكانی ئیمارات، قەتەڕ، عێراق،عومان، سعوودیە و ئیندۆنێزیا گەیشتوونەتە قۆناخی پلەی ئۆف.
چاوەڕوان دەكرێت 17ی مانگی داهاتوو تیرووپشكی یارییەكانی قۆناخی پاشكۆی كیشوەری ئاسیا رابكێشرێت و شەش هەڵبژاردەكە بەسەر سێ ئاستدا دابەشكراون.
- ئاستی یەكەم: قەتەڕ ، سعوودیە
- ئاستی دووەم: عێراق، ئیمارات
- ئاستی سێیەم: عومان، ئێندۆنیزیا
هەر هەڵبژاردەیەک دوو یاریی دەكات و یارییەكان لە یەک وڵات دەكرێت. قۆناخی پاڵاوتنەكانی پلەی ئۆف لە مانگی ئۆكتۆبەر بەڕێوەدەچێت.
یەكەم راستەوخۆ سەردەكەوێت و دووەمی هەردوو كۆمەڵەكە بە دوو یاریی هاتن و چوون رووبەرووی یەک دەبنەوە و براوەیان دەچێتە پاشكۆی جیهانی و لەئەگەری بردنەوەی هەڵبژاردەكەی كیشوەری ئاسیا، ئەوا 7 هەڵبژاردەی ئەو كیشوەرە دەگەنە یارییەكانی مۆندیالی 2026.
