فەرمی؛ ئالێکساندەر ئارنۆڵد ماڵئاوایی لە لیڤەرپوول کرد و چارەنووسی خۆی یەکلاییکردەوە

یاریگا –

ئالێکساندەر ئارنۆڵد بەفەرمی ماڵئاوایی لە لیڤەرپوول کرد و چارەنووسی خۆی یەکلاکردەوە، کۆتایی ئەم وەرزە ماڵئاوایی لە ئانفێڵد دەکات.

ئالێکساندەر ئاڕنۆڵد، بەرگریکاری ئینگلیزی لیڤەرپوول پەیامێکی ڤیدیۆیی بڵاوکردووەتەوە و بەفەرمی ماڵئاوایی لە لیڤەرپوول دەکات و کۆتایی ئەم وەرزە ریزەکانی رێدز بەجێدەهێڵێت.

After 20 years at Liverpool Football Club, now is the time for me to confirm that I will be leaving at the end of the season.

This is easily the hardest decision I’ve ever made in my life.

I know many of you have wondered why or been frustrated that I haven’t spoken about this… pic.twitter.com/emAw5RvXq0

— Trent Alexander-Arnold (@TrentAA) May 5, 2025

دوای بەسەربردنی 20 ساڵ لە لیڤەرپوول کاتی ئەوەیە رایبگەیەنم لە کۆتایی ئەم وەرزە یانەکە جێدەهێڵم، ئەمە قورسترین بڕیاری ژیانمە، دەزانم زۆرێک لە ئێوە لە هۆکارەکەی دەپرسن، یاخود بێزارن لەوەی تاوەکو ئێستا باسم نەکردووە، بەڵام هەمیشە مەبەستم ئەوەبووە سەرنجی تەواوم لەسەر بەرژەوەندییەکانی لیڤەرپوول بێت، کە بەدەستهێنانی نازناوی ژمارە 20 ئامانجەکە بوو.

ئەم یانەیە بۆماوەی 20 ساڵ هەموو ژیانم و هەموو جیهانم بووە، لە دەستپێک و لە ئەکادیمیای یانەکە تاوەکو ئێستا ئەو پاڵپشتی و خۆشەویستییەی کە لە هەموو کەسێکی ناوەوە و دەرەوەی یانەکە هەستم پێی کردووە بۆ هەمیشە لەگەڵم دەمێنێتەوە، بۆ هەمیشە قەرزاری هەمووتان دەبم. هۆکاری بڕیارەکەشم بریتییە لە تاقیکردنەوەی ئەزموون و ئالنگارییەکی نوێ.

لەناخی دڵمەوە سوپاسی هەمووان دەکەم، راهێنەرەکانم، بەڕێوبەرەکانم، هاوتیمەکانم، ستاف و تەواوی پاڵپشتییە سەرسوڕهێنەرەکەی ئێوە لە 20 ساڵی رابردوودا.

زۆر بەبەخت بووم کە توانیم لێرە خەونەکانم بەدی بهێنم و هەرگیز ئەو ساتە تایبەتانە بە ئاسایی نابینم کە بەختم هەبوو لەگەڵتان بەسەرم بردوون، خۆشەویستم بۆ ئەم یانەیە هەرگیز نامرێت.

فابریزیۆ رۆمانۆ رۆژنامەنووسی ئیتاڵی رایگەیاندووە، ئالێکساندەر ئارنۆڵد دوای کۆتایی هاتنی گرێبەستەکەی، ئەم هاوینە بە گرێبەستێکی ئازاد روودەکاتە ریزەکانی ریال مەدرید و بۆ ماوەی پێنج ساڵ گرێبەست لەگەڵ ریال مەدرید واژۆ دەکات، بەرگریکارە ئینگلیزەکە و یانە ئیسپانییەکە لەسەر زۆربەی خاڵەکان رێککەوتوون.