یاریگا –
بەفەرمی ئینتەر میلان پێکانی لاوتارۆ مارتینێزی راگەیاند و ئەستەمە بەرامبەر بارسێلۆنا یاریی بکات.
ماڵپەڕی فەرمی ئینتەر میلان بڵاویکردووەتەوە، ئەمڕۆ پشکنینی پزیشکی بۆ لاوتارۆ مارتینێز کراوە، دەرکەوتووە لە ماسوولکەکانی رانی چەپی تووشی پێکان بووە و وادەی گەڕانەوەی پەیوەستە بە توانای چاکبوونەوەی.
بەگوێرەی زانیارییەکانی سکای ئیتاڵیا، ئەستەمە لاوتارۆ بۆ یارییەکەی بەرامبەر بارسێلۆنا ئامادەبێت و بەڕێژەی %99 لەو یارییە بێبەش دەبێت.
Lautaro Martinez's conditions
— Inter ⭐⭐ (@Inter_en) May 2, 2025
چوارشەممەی رابردوو 30ـی نیسان بارسێلۆنا و ئینتەر میلان لە یاریی چوونی قۆناخی پێشکۆتایی چامپیۆنزلیگ رووبەڕووبوونەوە، لە کۆتا خولەکەکانی گێمی یەکەمی یارییەکە لاوتارۆ مارتینێزی ئەرجەنتینی و هێرشبەری ئینتەر میلان تووشی پێکان بوو، لەسەرەتای گێمی دووەم نەگەڕایەوە یاریگا و بەهۆی پێکان یاریگای جێهێشت.
سێشەممەی داهاتوو 6ـی ئایار، ئینتەر میلان لە یاریگای جۆزیێپی میازا لە یاریی گەڕانەوە میوانداری بارسێلۆنا دەکات و براوەیان دەگاتە یاریی کۆتایی پاڵەوانێتییەکە.
