یانەیەکی گەورە گواستنەوەی ئارنۆڵد بۆ مەدرید پەکدەخات

یاریگا –

تاوەکو ئێستا چارەنووسی ترێنت ئالێکساندەر ئارنۆڵد لەگەڵ لیڤەرپوول یەکلایی نەبووەتەوە و ریال مەدرید و یانەیەکی دیکە بە تەواوی خۆیان بۆ گواستنەوەی ئامادەکردووە.

پێگەی فیچاخێسی ئیسپانی تایبەت بە گواستنەوەی یاریزانان بڵاویکردووەتەوە، پاریس سانجێرمان بە توندی هاتووەتە سەرهێڵ و دەیەوێت رکابەری ریال مەدرید بکات.

بەگوێرەی زانیارییەکانی پێگەکە بێت، هاتنە سەرهێڵی پاریس سانجێرمان، هاوکێشەی گواستنەوەی ترێنتی بۆ ریال مەدرید ئاڵۆزکردووە.

تاوەکو ئێستا ڤیرجیڵ ڤان دایک و محەمەد سەڵاح گرێبەستەکانیان لەگەڵ لیڤەرپوول بۆ دوو ساڵی دیکە نوێکردەوە و تەنیا ئارنۆڵد لە لیستەکەدا ماوە کە لە هاوینی داهاتوو گرێبەستەکەی بەسەربچێت.

میدیاکانی نزیک لە ریال مەدرید، گواستنەوەی ئارنۆڵد بۆ بێرنابیۆ بە یەکلاییبووەوە لە قەڵەم دەدەن، هەرچەندە نە یاریزانەکە و نە لیڤەرپوول بە فەرمی هیچ قسەیەکیان لەسەر بابەتەکە نەکردووە.

ریال مەدرید ئۆفەرێکی بۆ ماوەی پێنج ساڵ پێشکەشی ئارنۆڵد کردووە و بەگوێرەی زانیارییەکانی رۆژنامەی مارکا بێت، بەرگریکارە ئینگلیزییەکە بە ئۆفەرەکە دڵخۆشە.