یاریگا –
یۆرگن کڵۆپ لەبەردەم دوو ئەگەردایە بۆ دەستهەڵگرتن لە ئەرکەکەی لەگەڵ رێد بوڵ و گەڕانەوە بۆ کاری راهێنەرایەتی.
مانگی ئۆکتۆبەری ساڵی رابردوو بوو کۆمپانیای رێد بوڵ بەفەرمی کڵۆپی راهێنەری پێشووی لیڤەرپوولی وەک سەرپەرشتیاری یەکەمی سەرجەم تیمەکانی تۆپی پێی کۆمپانیاکەیان راگەیاند. ئەرکی سەرەکیشی خۆی دەبینێتەوە لە دەستنیشانکردنی راهێنەران، گواستنەوەی یاریزانان، فەلسەفە و شێوازی یاریکردن، پەرەپێدانی بەهرەمەندان و زۆر شتی دیکەش.
بەگوێرەی نوێترین زانیاریی کە ماڵپەڕی UOL ESPORTEی بەڕازیلی ئاشکرای کردووە، کڵۆپ لەم ئەرکەیدا لەگەڵ رێد بوڵ زۆر هەست بە ماندبوون دەکات. بەڵام وا بە زووییش دەستیان لێهەڵناگرێ لە دوو ئەگەردا نەبێت.
وەک سەرچاوەکە زانیویەتی، یۆرگن تەنها کاتێک کۆمپانیا نەمساییەکە هەڵدەگرێت کە ئەگەر لەلایەن یانەی ریال مەدرید یاخود هەڵبژاردەی بەڕازیلەوە پەیوەندی پێوەبکرێت.
🚨 BREAKING: Sources close to Jurgen Klopp say he feels worn out by his role at Red Bull, but he would only leave if 2 teams call him: Real Madrid or Brazil NT. @UOLEsporte pic.twitter.com/WeSn3VwKAQ
— Madrid Zone (@theMadridZone) April 16, 2025
ئەگەرچی تا ئێستا هیچ شتێکی فەرمی لەلایەن خودی راهێنەرە ئەفسووناوییەکەی پێشووی لڤەرپوولەوە نەوتراوە، بەڵام بەڕازیل دوای دوورخستنەوەی دۆریڤاڵ جونیۆر لە کۆتاییەکانی مانگی رابردوو، تا ئێستا بێ راهێنەرن.
هەرچی مەدریدیشە، ئەنجامە خراپەکانیان کارلۆ ئانچێلوتی لە لێواری دوورخستنەوە نزیک کردووەتەوە. کرانەدەرەوەیان لە چامپیۆنزلیگ لەسەر دەستی ئارسیناڵ هەر لە چارەکی کۆتایی بە ئەنجامی هەردوو یاریی 1-5، هێندەیتر راهێنەرە ئیتاڵییەکەی لە پێگەکەی لەقتر کردووە.
