فەرمی: سیڤیلیا راهێنەرەکەی دوورخستەوە

یانەی سیڤیلیای ئیسپانیا بەفەرمی دوورخستنەوەی گارسیا پیمیێنتای راهێنەری راگەیاند.

ناوبراو لە مانگی 6ی پارساڵ ئەرکی راهێنەرایەتی سیڤیلیای گرتە دەست. لەو ماوەیەدا 34 یاری بەڕێوەبرد و تەنها 11یاری بردووەتەوە. لەم وەرزەی لالیگاش یانەکە دابەزیووە بۆ پلەی 13هەم پاش چوار شکستی یەک لەدوای یەک، نوێترینیان بەرامبەر ڤالێنسیا بوو.

لە بەیاننامەی فەرمی سیڤیلیا هیچ شتێکیان نەدرکاندووە سەبارەت بە راهێنەری داهاتوو.

گارسیا پێشتر لە خولی پلە یەک تەنها راهێنەرایەتی لاس پاڵماسی کردبوو. توانیبووی 39٪ی یارییەکان بباتەوە لە کاتێکدا لەگەڵ سیڤیلیا ئەو رێژەیە تەنها 32٪ بوو.