یاریگا –
دوای شکستە چاوەرواننەکراوەکەیان لە نێو سانتیاگۆ بێرنابیۆ 1-2 لەسەردەستی ڤالێنسیای گرفتار کە شەڕی مانەوە دەکات لە لالیگا، کارلۆ ئانچێلۆتی چەند لیدوانێکی دا کە تێیدا بەشێوەی نیمچەفەرمیی ئاڵای سپی هەڵکرد بۆ کێبڕکێکردن لەسەر نازناوەکە.
بەو شکستە، ریال دەرفەتێکی گەروەی بە بارسێلۆنای پێشەنگ دا کە لە بردنەوەی ئەمشەویان بەرامبەر ریال بێتیس، جیاوازییەکە بگەیەننە 6 خاڵ. بۆیە هەر لەو روانگەیەوە کارلۆ وتی
ئێستا شەڕکردن لەپێناو نازناوی لالیگا زۆر قورستر بووە. بەڵام ئێمە دەبێ تا کۆتایی زۆر بەباشیی کۆشش بکەین. بژاردەمان لەبەردەست ماوە، بەڵام دەبێ تا کۆتایی بجەنگین.
فەوتاندنی لێدانە سزاکان یەکێکی دیکە بوو لە بابەتی لێدوانەکانی ئانچێلۆتی و نائومێدیی لەو بارەیەوە نەشاردەوە.
هەر لە گێمی یەکەم شاهانەکان دەرفەتی ئەوەیان بۆ رەخسا لە رێگەی لێدانی سزاوە ئەنجامەکە یەکسان بکەنەوە، بەڵام ڤینیسیۆس جونیۆر فەوتاندی دوای سەیڤێکی جوانی مامارداشڤیلی گۆڵپارێزی شەمشەمەکوێرەکان. راهێنەرە ئیتاڵییەکە وتی
وەرزێکی ئاڵۆز بوو بۆمان بۆ جێبەجێکردنی لێدانی سزا. بێڵینگهام فەوتاندوویەتی، ئێمبابێش و ئەوە ڤینیسیۆسیش. من هەوڵمدا متمانەی بۆ دروستبکەمەوە (دوای ئەوەی پێشتریش پێناڵتی لەدەستدابوو) بەڵام ئەمەشی گۆڵ نەکرد.
دەربارەی ئەوەی سزاکان دەداتە کێ دوای ئەو شکستەی ڤالێنسیا، کارلۆ بە “با ببینین” وەڵامی دایەوە.
ئەم دۆڕانەی مێرێنگی دوای یارییە ماراسۆنییەکەی سێشەممەی رابردوویان هات بەرامبەر ریال سۆسیدا لە میانی چوارگۆشەی زێڕینی جامی شا کە 4-4 کۆتایی هات و ریال بە کۆی یاریی چوون و گەڕانەوە سەرکەوت بۆ فیناڵ.
ئانچێلۆتی رەتیدکردەوە هۆکارەکانی دۆڕانیان بە ڤالێنسیا پەیوەندی بۆ لایەنی وەرزشیی یاخود جەستەییەوە بووبێت. وتی
دۆڕانەکە نە وەرزشیی (هونەری) بوو نە جەستەیی، دەرفەتی زۆرمان رەخساند. زۆریش نزیکدەبووینەوە لە تۆمارکردنی گۆڵ. رەنگە هۆکار کەمیی کاریگەربوونمان بووبێت، یان لە وەرگرتنی تۆپەکان، بەڵام زۆر کەم تۆپیشمان لەدەست دەدا
ریال دەبێ لە ماوەی دوو رۆژی داهاتوودا خۆی کۆبکاتەوە بۆ بەڕێکەوتن بەرەو لەندەن بۆ رووبەڕووبوونەوەی ئارسیناڵ لە یاریی چوونی قۆناخی چارەکی کۆتایی چامپیۆنزلیگ.
