یاریگا –
چارەنووسی سەمیر بابۆ لەگەڵ یانەی هەولێر یەکلایی بووەوە و دەستلەکارناکێشێتەوە.
تۆڕی وەرزشی یاریگا زانیویەتی، ئەمڕۆ سەمیر بابۆ لەگەڵ دەستەی کارگێڕی یانەکە کۆبووەتەوە، پاش گفتوگۆیەکی چڕ بڕیاریانداوە بابۆ لە پۆستەکەی بمێنێتەوە و یانەی هەولێر جێناهێڵێت.
هەروەها یاریگا زانیویەتی، سەمیر بابۆ کۆمەڵێک مەرجی بۆ مانەوە هەیە و بەو مەرجانە ئامادەیە تاوەکو کۆتایی وەرز بمێنێتەوە.
دوای دۆڕانی دوا یاری بەرامبەر قاسم 0-1 لە یاریگای فڕانسۆ هەریری، سەمیر بابۆ لە لێدوانێکیدا رۆژنامەوانیدا، چەندین کێشەی کارگێڕی ئاشکراکرد و داوای گەردن ئازایی لە هاندەران و یاریزانانی یانەکەی کرد.
بابۆ لە دەستپێکی ئەم وەرزە، ئەرکی مەشقی یانەکەی گرتە ئەستۆ و گۆڕانکاری گەورە لە پێکهاتەی سەرەکی یانەکەدا کرا، بەڵام کەتیبەکەی بابۆ ئێستا بەکۆکردنەوەی 32 خاڵ لە پلەی چواردەمی ریزبەندی خولی ئەستێرەکانی عێراق دێت، هەرچەندە یارییەکی دواخراوی بەرامبەر دهۆک هەیە.
هەولێر 11ی ئەم مانگە لە یاریگای ئەحمەد رازی رووبەڕووی یانەی حدوودی خاوەن دوا پلەی ریزبەندی دەبێتەوە.
