یاریگا –
شه‌وكه‌ت محه‌مه‌د هێرشبەری شه‌قڵاوه بە باشترین یاریزانی گەڕی بیست و پێنجه‌می خولی نایابی کوردستان دەستنیشانکرا، کە هەفتانە تۆڕی وەرزشی یاریگا باشترین یاریزانی هەر گەڕێکی خولەکە هەڵدەبژێرێت.
یاریزانه 26 ساڵانه‌كه‌ی شه‌قڵاوه باشترین یاریزانی ئەم هەفتەیەی خولی نایابی کوردستان بوو، لە یاریی بەرامبەر هه‌ندرێن له خوله‌كی 66 به‌شداری یارییه‌كه‌ی كرد و له خوله‌كی 74 تاكه گۆڵ و بردنه‌وه‌ی تۆماركرد و سێ خاڵی گرنگی به‌خشیه یانه‌كه‌ی دوای ئه‌وه‌ی 14 یاریی بوو له‌سه‌ر یه‌ك بردنه‌وه‌ی تۆمارنه‌كردبوو.
شه‌وكه‌ت دوای ئه‌وه‌ی یانه‌ی ئارارات له خولی نایابی كوردستان كشایه‌وه، یه‌كێتی تۆپی پێی كوردستان 72 كاتژمێری بۆ یاریزانه‌كانی یانه‌كه دیاریكرد بۆ ئه‌وه‌ی یانه‌ی داهاتوویان دیاری بكه‌ن و یاریزانه‌كه‌ش په‌یوه‌ندی به شه‌قڵاوه كرد و له‌م وه‌رزه سێ گۆڵی بۆ یانه‌ی شه‌قڵاوه كردووه.
شه‌قڵاوه به‌م سه‌ركه‌وتنه ژماره‌ی خاڵه‌كانی بوو به 22 خاڵ، پله‌ی 22ـی خوله‌كه‌ی گرتووه و هێشتا له ناوچه‌ی دابه‌زینه بۆ ریزی یانه پله‌یه‌كانی كوردستان.
