یاریگا –
تاوەکو ئێستا چارەنووسی سەمیر بابۆ، لەگەڵ یانەی هەولێر یەکلایینەبووەتەوە و هاندەرانیش فشارێکی زۆر لە دەستەی کارگێڕی دەکەن.
تۆڕی وەرزشی یاریگا زانیویەتی، بڕیارە ئەمڕۆ کاتژمێر 15:00 بە کاتی هەولێر، سەمیر بابۆ و دەستەی کارگێڕی کۆببنەوە و نامەی دەست لەکارکێشانەوەی پەسند بکەن.
دوای دۆڕانی دوا یاری بەرامبەر قاسم 0-1 لە یاریگای فڕانسۆ هەریری، سەمیر بابۆ لە لێدوانێکیدا رۆژنامەوانیدا، چەندین کێشەی کارگێڕی ئاشکراکرد و داوای گەردن ئازایی لە هاندەران و یاریزانانی یانەکەی کرد.
بابۆ لە دەستپێکی ئەم وەرزە، ئەرکی مەشقی یانەکەی گرتە ئەستۆ و گۆڕانکاری گەورە لە پێکهاتەی سەرەکی یانەکەدا کرا، بەڵام کەتیبەکەی بابۆ ئێستا بەکۆکردنەوەی 32 خاڵ لە پلەی چواردەمی ریزبەندی خولی ئەستێرەکانی عێراق دێت، هەرچەندە یارییەکی دواخراوی بەرامبەر دهۆک هەیە.
بەگوێرەی زانیارییەکانی یاریگا، دەستەی کارگێڕی هەولێر، دەست لەکارکێشانەوەی بابۆ پەسند دەکەن و تاوەکو کۆتایی ئەم وەرزە، ئەرکی راهێنەرایەتی بە حوسێن کازم، یاریدەدەری سەمیر بابۆ دەستپێرن.
جیا لە سەمیر بابۆ، هەریەکە لە ئەحمەد قەدوور، یاریدەدەر و کاوە ئیبراهیم، راهێنەری گۆڵپارێزان لە ستافی راهێنەرایەتی نامێنن.
لە دوای یارییەکەی قاسم، دوێنێ یاریزانانی هەولێر مەشقەکانی نەکردووە و ئەمڕۆش مەشق ناکات.
حوسێن کازم لە 22ی مانگی رابردوودا، بۆ زیادکردنی ئەزموونی راهێنەرایەتی، پڕۆسەی پێکەوەژیانی (معایشة)ی لەگەڵ عەدنان حەمەد، راهێنەری یانەی عڕووبەی سعوودی کرد.
هەولێر 11ی ئەم مانگە لە یاریگای ئەحمەد رازی رووبەڕووی یانەی حدوودی خاوەن دوا پلەی ریزبەندی دەبێتەوە.
