هاوژینەکەی ئۆنانا لە ئینگلتەرا هێرشی کرایە سەر

یاریگا –
هاوژینی ئاندرێ ئۆنانا، گۆڵپارێزی مانچێستەر یونایتد لە چێشتخانەیەکی ئیتاڵی دزی لێکرا.
میلانیا کامایۆ، کە کەسایەتی سۆشیال میدیایە و وەک دەرمانساز، بازرگان و خێرخواز کاردەکات، لە 29ی ئازاردا لە شوێنی وەستانی ئۆتۆمبێلەکانی چێشتخانەیەکی ئیتاڵی لە ئینگلتەرا هێرشی کرایە سەر.
بەگوێڕەی هەواڵێکی رۆژنامەی دەیلی مەیل، لیام رۆس تەمەن 25 ساڵ، خەڵکی ناوچەی ویبسی لە برادفۆرد، تۆمەتبارکراوە بە دزینی کەلوپەلی گرانبەها لە هاوسەرەکەی ئۆنانا. دەگوترێت دزەکە جانتایەکی هێرمێس بیرکینی بە بەهای 62 هەزار پاوەند و هەروەها کاتژمێرێکی رۆلێکسی دزیوە کە هەردووکیان هی هاوسەری ئۆنانا بوون. تۆمەتبارەکە رۆژی هەینی لە دادگای دادوەری چێستەر ئامادەبوو و جگە لە تۆمەتی دزیکردن، بە تۆمەتی بازرگانیکردن بە ماددە هۆشبەرەکانیشتۆمەتبار کرا. بڕیارە لە مانگی ئایاردا جارێکی دیکە لە دادگای باڵای چێستەر ئامادەبێت.
کامایۆ زۆرجار لە پلاتفۆرمەکانی وێنەی شێوازی ژیانی شاهانەی خۆی لەگەڵ جانتا براندەکانی بڵاودەکاتەوە، لەنێویاندا هێرمس بیرکین؛ ئەو جانتایانەی کە بە یەکێک لە دەگمەنترین و داواکراوترین جانتاکانی جیهان دادەنرێت.
View this post on Instagram
هەندێک لە جانتاکانی هێرمس بیرکین نرخیان دەگاتە سەروو سەدان هەزار پاوند؛ گرانترین نموونە کە لەم براندە فرۆشرا بە 1.5 ملیۆن پاوەند (2 ملیۆن دۆلار)بوو.
کامایۆ لە ساڵی 2023ەوە هاوسەرگیری لەگەڵ ئاندرێ ئۆنانا گۆڵپارێزی هەڵبژاردەی کامیرۆن کردووە، ئەو دوو هاوسەرە کە دەگوترێت منداڵێکیشیان هەیە، دوای ئەوەی ئۆنانا هاوینی رابردوو لە ئینتەرمیلانەوە پەیوەندی بە مانچێستەر یونایتدەوە کرد، لە شاری مانچێستەر دەژین.