دادگای کاس بڕیاری کۆتایی لەسەر شوێنگرەوەی لیۆن لە مۆندیالی یانەکان دەدات

یاریگا –

کێشەی بەشداریکردنی لیۆنی مەکسیکی لە مۆندیالی یانەکان یەکلایی نەبووەتەوە و بڕیارە لە سەرەتای مانگی داهاتوو هەموو شتێک روون ببێتەوە.

دادگای ناوبژیوانی وەرزشی (کاس) رایگەیاند، 5ی مانگی داهاتوو، دانیشتنێکی تایبەت لەسەر تانەی لیۆن بۆ دوورخستنەوەی لەلایەن فیفا لە مۆندیالی یانەکان رێکدەخات.

لە بەیاننامەیەکی فەرمیدا، دادگای کاس بڵاویکردووەتەوە

پاچووکا و لیۆن تانەیان بۆ رەتکردنەوەی بڕیاری لیژنەی تێهەڵچوونەوەی فیفا داوە، هەروەها لیۆن تانەیەکی دیکەی دژی ئەمینداری گشتی فیفا پێشکەشکردووە، بەهۆی دوورخستنەوەیان لە مۆندیالی یانەکان.

بەهۆی ئەوەی هەردوو یانەی لیۆن و پاچووکای مەکسیکی یەک خاوەنیان هەیە، ناتوانن بەیەکەوە بەشداری هیچ پاڵەوانیەتییەکی سەر بە فیفا بکەن، بۆیە لیۆن لە دادگای کاس تانەی لە بڕیارەکە داوە و تانەکەی قبووڵکراوە.

دانیشتنێکی تایبەت لە 5ی مانگی دهاتوو دەکرێت، ئەگەر لیۆن کەیسەکە بباتەوە، دەتوانێت لە کۆمەڵەی چوارەم شانبەشانی چێڵسی، فلامێنگۆ و تەرەجی یاریی بکات.

بژاردەی فیفا بۆ شوێنگرتنەوەی لیۆن بریتییە لە رێکخستنی یارییەکی پلەی ئۆف لە نێوان یانەی لۆس ئانجلسی ئەمریکی و کڵەب ئەمێریکای مەکسیکی و براوەی یارییەکە، بەشداری لە مۆندیالی یانەکاندا بکات.

مۆندیالی یانەکان لە 15ی یۆنیۆ/حوزەیرانی داهاتوو لە ویلایەتە یەکگرتووەکانی ئەمریکا دەستپێدەکات  و فیفا ئامادەکاری بۆ ئاشکراکردنی ناسنامەی یانەکە دەکات.

براوەی یارییەکی پلەی ئۆف بڕی 9.55 ملیۆن دۆلار لەلایەن فیفا وەردەگرێت، ئەمەش وەکو شایستەییەکی دارایی بەشداریکردن لە پاڵەوانیەتییەکە بە هەموو یانەکانی بەشدار دراوە.

پێشتر دەنگۆی زۆر لەسەر بەشداریکردنی نەسڕ لە پاڵەوانیەتییەکە هەبوو، بەڵام رۆژنامەی ریازییەی سعوودی لە زاری بەرپرسێکی باڵای فیفا بڵاویکردبووەوە، رێساکانی پاڵەوانیەتییەکە زۆر روونن و نابێ دوو یانەی وڵاتێک بەشداری مۆندیالی یانەکان بکەن، تەنیا بەو مەرجەی لە ساڵانی 2021 تاوەکو 2024 نازناوێکی لەسەر ئاستی کیشوەر بەدەستهێنابێت.

سەرچاوەکە ئاشکرایکردبوو، ئاسیا خاوەنی چوار کورسییە و هیلال نوێنەرایەتی سعوودیە دەکات، بەمەش نەسڕ ناتوانێت بەشداری پاڵەوانیەتییەکە بکات.