مەسعود میڕال: یارییەکی گەورەمان کرد بەرامبەر تیپێکی گەورەی وەک زەوڕا

یاریگا –

دهۆک سەرکەوتنێکی گرنگی تۆمار کرد و راهێنەری تیپەکەش دەڵێت لە یارییەکی گەورەدا توانیمان لە تیپێکی گەورەی وەک زەوڕا ببەینەوە.

لە گەڕی 26ـی خولی ئەستێرەکانی عێراق، دهۆک لە دەرەوەی یاریگای خۆی بە ئەنجامی 2 _ 1 لە زەوڕای بردەوە، وێڕای ئەوەی لە خولەکی 42 یارییەکە لۆکاس تۆرسی بەرگریکاری دهۆک بە کارتی سوور کرایە دەرەوە بەڵام دهۆک یەکێک لە گرنگترین سەرکەوتنەکانی ئەم وەرزەی بەدەستهێنا.

مەسعود میڕال راهێنەری دهۆک دەربارەی سەرکەوتنەکەیان دوای یارییەکە گوتی:

ئاستێکی بەرزمان پێشکەش کرد ویارییەکی گەورەمان کرد بەرامبەر تیپێکی گەورەی وەک زەوڕا، هەموولایەک دەزانن بۆ ئەم یارییە کێشەمان هەبوو بەڵام یاریزانەکان لە ئاست بهرپرسیارەتی دابوون، پیرۆزبایی لە دەستەی کارگێڕی و هاندەران دەکەم هیوادارم بەمشێوەیە تاکۆتایی پاڵپشتمان بن.

محەمەد ساڵح گۆڵپارێزی دهۆک کە لەم یارییەدا ئاستێکی بەرزی پێشکەش کرد دەربارەی یارییەکە گوتی:

شانازی بە تیپەکەمەوە دەکەم یارییەکی پاڵەوانانەیان کرد بەرامبەر یانەیەکی وەکو زەوڕا، سەرکەوتنەکە گرنگ بوو بەڵام گرنگتر ئەوەیە لەسەر هەمان ئاست بەردەوام بین و پارێزگاری لەم سەرکەوتنانە بکەین.

دهۆک بەم سەرکەوتنە کۆی خاڵەکانی گەیاندە 40 خاڵ لە ریزبەندی حەفتەمی خولی ئەستێرەکانی عێراق دێت و پێنج یاریی دواخراویشی هەیە، یاریی داهاتووشی بەرامبەر مینا دوا دەخرێت بەهۆی یاریی چوونی کۆتایی خولی یانە پاڵەوانەکانی کەنداو کە هەڵۆکانی چیا لە کوەیت بەرامبەر قادسیە یاریی دەکەن