یاریگا –
ئەم وەرزە بۆ گابریێل ماگالاش ئەستێرەی بەڕازیلی یانەی ئارسیناڵی ئینگلیزی كۆتاییهات.
گابریێل رۆژی سێشەممەی رابردوو لە یاریی یانەكەی بەرامبەر فولهام تووشی پێكان بوو بەهۆیەوە یاریگای جێهێشت.
هەژماری فەرمی ئارسیناڵ لە پلاتفۆرمی ئێكس لە بەیاننامەیەكی فەرمیدا رایگەیاند ئەم وەرزە بۆ بەرگریكارەكەیان كۆتاییهاتووە.
لە بەیاننامەكەی ئارسیناڵدا هاتووە، گابریێل لە یاریی بەرامبەر فولهامدا لە ماسولكەكانی رانیدا تووشی پێكان بووە و پێوویستی بە نەشتەرگەری هەیە.
لە چەند رۆژی داهاتوودا نەشتەرگەری بۆ دەكرێت و دەست بە پڕۆگرامی چاكبوونەوە و ئامادەكاری بۆ وەرزی نوێ دەكات.
هەمووان لە یانەكە هیوای زوو چاكبوونەوە و پشتگیری گابی دەكەن.
چاوەڕوان دەكرێت لە ناوەڕاستی هەفتەی داهاتوودا ئارسیناڵ لە قۆناخی چارەگی كۆتایی چامپیۆنزلیگ رووبەڕووی ریال مەدرید ببێتەوە.
