یاریگا –
دوای سەرکەوتنەکەیان بەرامبەر مینا، راهێنەری نەورۆز دەڵێت پێویستە لەسەر بردنەوەکان بەردەوام بین.
لە گەڕی 26ـی خولی ئەستێرەکانی عێراق، نەورۆز لە یاریگای خۆی بە ئەنجامی 1 _ 0 لە مینای بردەوە، ئەم سەرکەوەتنەی نەورۆز لە کاتێکدایە کە یانەکە چوار یاریی رابردوو تووشی شکست هاتبوو، لەم یارییەدا لە خولەکی 42 عەلاعەبدولزهرە کاپتنی مینا بە کارتی سوور کرایە دەرەوا و راستگۆ فەریق خولەکی 87 گۆڵی سەرکەوتنی سوورپۆشەکانی تۆمار کرد.
قەحتان جەسیر راهێنەری نەورۆز دوای یارییەکە لە کۆنگرەی رۆژنامەوانی دەربارەی سەرکەوتنەکەیان گوتی:
سەرکەوتنەکەمان لە کاتێکی گونجاوبوو تایبەت دوای ئەوەی زنجیرەیەک ئەنجامی خراپمان بەدەستهێنا، توانیمان زاڵبین بەسەر ئەو بارە دەروونیەی کە تووشی یاریزانەکان هاتبوو، پێویستە لەسەر بردنەوە بەردەوام بین، چونکە یاریزانەکانمان لە توانیاندا هەیە ئەنجامی باشتر بەدەست بهێنین، سوپاسی هاندەرانی نەورۆز دەکەین کە وەک هەمیشە باشترین پالپشتیکاری تیپەکەن لە هاموو بارودۆخێک، مارادۆنای هێرشبەریش بەتەواوی چاک بۆتەوە و ئەمڕۆ نەمان ویست پەلەی لێبکەین لە گەڕانەوە بۆیە یارییمان پێنەکرد و بۆ یارییەکانی داهاتوو ئامادەیە.
بەم سەرکەوتنە نەورۆز چەند خانەیەک لە ریزبەندی خولی ئەستێرەکانی عێراق هاتە پێشەوە و بە 33 خاڵ هاتە ریزبەندی 12ـەم، گەڕی داهاتووش لە بەغدا رووبەرووی کەرخ دەبێتەوە.
