بارسێلۆنا تووشی کێشەیەکی لەناکاو بووەتەوە و لەوانەیە دوو یاریزان لەدەستبدات
لالیگا بەیاننامەیەکی توندی بڵاوکردووەتەوە
یاریگا –
بارسێلۆنا بەشێوەیەکی بەرچاو سنووری مووچەکانی کەمکردووەتەوە و ئەمەش هاوتەریبە لەگەڵ مەرجەکانی لالیگا بۆ تۆمارکردنی ناوی دانی ئۆلمۆ و پاو ڤیکتۆر، بەڵام راپۆرتی دارایی کێشەی هەیە و لالیگا نیگەرانە.
لالیگا بەیاننامەیەکی لەسەر دۆخی ئێستای بارسێلۆنا بڵاوکردووەتەوە و نووسیویەتی
بارسێلۆنا گۆڕنکاری گەورەی لە ئاستی گشتی مووچەی یاریزاناندا کردووە، بەڵام فرۆشتنی کورسییەکانی VIP یاریگای کامپ نو بەبڕی 100 ملیۆن یۆرۆ لە تۆمارەکانی دارایی یانەکەدا نین و بەمەش پابەندی خۆی بۆ تۆمارکردنی ناوی دانی ئۆلمۆ و پاو ڤیکتۆر پێشێلکردووە.
🚨 NOTA INFORMATIVA
Respecto de la operación corporativa relacionada con Palcos VIP comunicada a LALIGA por el FC Barcelona a finales del mes de diciembre pasado.
— LALIGA Corporativo (@LaLigaCorp) April 2, 2025
بارسێلۆنا لە سەرەتای ئەمساڵدا، راپۆرتێکی پڕ لە وردەکاری بۆ درۆشتنی 475 کورسی تایبەتی یاریگای کامپ نوی نوێ بۆ 30 ساڵی داهاتوو بەبڕی 100 ملیۆن یۆرۆ رادەستی لالیگا کرد.
کۆمپانیای وەبەرهێنانی فۆرتا و نیو ئێرا ڤیژنەری گروپ، بڕی 57 ملیۆن یۆرۆیان بۆ کڕینی کورسییەکان بۆ بارسێلۆنا خەرجکردووە، هەرچەندە لالیگا گومانی لە راستی و دروستی گرێبەستەکە هەبوو.
لالیگا گلەیی لە راپۆرتی دارایی بارسێلۆنا هەیە، چونکە پابەندی خۆی بۆ فرۆشتنی کورسییەکانی VIP جێبەجێ نەکردووە و بابەتەکە لە راپۆرتی دارایی خۆی نەنووسیوە و ئەمەش لەوانەیە کاریگەری لەسەر مانەوەی ئۆلمۆ و ڤیکتۆر بە تۆمارکراوی دروستبکات.
پێشتر بە پشتبەستن بە بڕیارێکی ئەنجوومەنی باڵای وەرزشی ئیسپانیا، ناوی هەردوو یاریزانەکە لە لالیگا تۆمارکرا، بەڵام بە شێوەیەکی كاتی تاوەكو ئەو تانەیەی لەلایەن یانەكەوە پێشكەشكراوە یەكلاییدەبێتەوە.
بەهۆی یاسایی دارایی خاوێن، بارسێلۆنا لە سەرەتای وەرزەوە کێشەی لە تۆمارکردنی ناوی دانی ئۆلمۆ یاریزانی نوێی یانەکە هەبوو، بارسا چەند جارێک هەوڵیدا ناوی هەردوو یاریزانەکە تۆمار بکات، بەڵام کۆمەڵەی لالیگا رەتیکردەوە، تا دواجار ئەنجوومەنی باڵای وەرزشی ئیسپانیا رەزامەندییدا ناوی یاریزانەکە بە کاتی تۆماربکرێت.
کێشەی تۆمارکردنی ناوی ئۆلمۆ و ڤیکۆر چییە؟
بەگوێرەی یاساکانی لالیگا هەر یانەیەک بەگوێرەی باڵانسی نێوان خەرجییەکان و داهاتەکانی دەتوانێت مووچەی یاریزانەکانی بدات، واتە نابێت یانەکان خەرجییەکی زۆر بکەن بەبێ ئەوەی هێندە داهاتیان هەبێت، ئەمەش بۆ پاراستنی یانەکانە لە مایەپووچبوون.
مانگی فێبرایەری 2024 بەگوێرەی راگەیاندراوێکی کۆمەڵەی لالیگا، بەرزترین رێژەی مووچەی رێگەپێدراوی بارسێلۆنا 204 ملیۆن یۆرۆ بوو لەکاتێکدا ئەوکات مووچەی یاریزانانی یانەکە دەگەیشتە 500 ملیۆن یۆرۆ، بارسێلۆنا بۆ ئەوەی ئەو ئاستی مووچەی رێگەپێدراوی یاریزانەکانی بگەیەنێتە ئاستی مووچەی راستەقینەی یاریزانەکانی، دەستی بە زیادکردنی داهاتەکانی کرد، دەستی بە فرۆشتنی ئەو یاریزانانە کرد کە مووچەیان زۆرە و دەستی بە گەڕان بەدوای گرێبەستی سپۆنسەریکردن و بەکرێدانی موڵکەکانی یانەکەی کرد، لە مانگی سێپتێمبەری 2024 ئاستی مووچەی رێگەپێدراوی یاریزانەکانی گەیاندە 426 ملیۆن یۆرۆ، لەکاتێکدا هێشتا ئاستی مووچەی راستەقینەی یاریزانەکانی بلاوگرانا 500 ملیۆن یۆرۆ بوو.
راپۆرتی تایبەت؛ بۆچی تا ئێستا بارسێلۆنا نەیتوانیوە ناوی دانی ئۆلمۆ تۆمار بکات؟
بارسێلۆنا چۆن هەوڵی چارەسەرکردنی کێشەکانیدا؟
بارسێلۆنا لە رێگای نوێکردنەوەی گرێبەستەکەی لەگەڵ کۆمپانیای نایکی 18 ملیۆن یۆرۆ پاشەکی گرێبەستەکەی وەرگرت و 15 ملیۆن یۆرۆشی وەکو پاشەکی گرێبەستەکەی بۆ فرۆشتنی ستۆدیۆکانی بۆ هەژمارکرا.
لالیگا 39 ملیۆن یۆرۆی وەکو لێخۆشبوونێک بۆ کارەکانی نۆژەنکردنەوەی یاریگای کامپ نوو بۆ بارسێلۆنا هەژمارکرد، ئەمەش وەکو ٪5ـی قەرەبووکردنەوەی کارەکانی نۆژەنکردنەوەی یانەکە بوو.
بارسێلۆنا کاتێک ستۆدیۆیەکانی بە 200 ملیۆن یۆرۆ فرۆحشت، وابڕیاربوو هاوینی 2022 پێشەکی گرێبەستەکەی (20 ملیۆن یۆرۆ) وەربگرێت، 180 ملیۆن یۆرۆیەکەی دیکە لە ماوەی سێ ساڵدا وەربگرێت، واتە هەر ساڵێک 60 ملیۆن یۆرۆی پێبدرێت، بەڵام رێژەی داهاتی هەر ساڵێک لە 40 ملیۆن یۆرۆ زیاتر نەبوو.
بارسێلۆنا بۆ ئەوەی کورتهێنانەکەی داهاتی فرۆشتنی ستۆدیۆیەکانی پڕ بکاتەوە، پەنای بردە بەر نوێکردنەوەی گرێبەستی نایکی، کە 154 ملیۆن یۆرۆی وەکو شیرینی نوێکردنەوەی گرێبەستەکەی پێدرا، یانە کەتەلۆنییەکە دڵخۆشبوو بەوەی بە شیرینی نوێکردنەوەی گرێبەستەکەی نایکی بگاتە ئاستی راستەقینەی مووچەی یاریزانەکانی.
بارسێلۆنا بەرامبەر 1.7 ملیار یۆرۆ بۆ ماوەی 14 ساڵ گرێبەستەکەی لەگەڵ نایکی نوێکردەوە و 154 ملیۆن یۆرۆی وەکو شیرینی نوێکردنەوەی گرێبەستەکەی پێدرا، بەڵام لالیگا بڕیاریدا ئەو بڕە پارەیەی شیرینی گرێبەستەکە دابەشی هەر 14 ساڵ بکرێت، نەوەک تەنیا بۆ داهاتی ئەمساڵ هەژمار بکرێت، بەمەش لەجیاتی ئەوەی 154 ملیۆن یۆرۆ بچێتە سەر باڵانسی داهاتەکانی ئەم وەرزەی یانەکە، تەنیا 11.5 ملیۆن یۆرۆ وەکو داهاتی نوێکردنەوەی گرێبەستەکەی بۆ ئەم وەرزە هەژمارکرا.
پلانی B بارسێلۆنا بۆ تۆمارکردنی ناوی دانی ئۆلمۆ چیبوو؟
بارسێلۆنا دەستی بۆ دوایین کارتی بردووە و دەیەوێت بە فرۆشتنی کورسییەکانی VIP بتوانێت 100 ملیۆن یۆرۆی دەستبکەوێت بۆ ئەوەی بتوانێت ئەو کورتهێنانە لە ئاستی مووچەی رێگاپێدراوی یاریزانەکانی پڕ بکاتەوە، بەڵام کۆمەڵەی لالیگا گومانی لە بەڵگەنامەکانی بارسێلۆنا هەیە و دەیەوێت دڵنیایی زیاتری لەبارەی گرێبەستەکەوە پێبدرێت.
پێشتر چەند جارێک لالیگا گومانی لە راستی و دروستی بەڵگەنامەکانی بارسێلۆنا هەبووە، بۆیە یانە کەتەلۆنییەکە متمانەی لەدەست داوە و کۆمەڵەی لالیگا دەیەوێت دڵنیابێتەوە گرێبەستی فرۆشتنی کورسییەکانی VIP یاریگای بارسێلۆنا ساختە نین.
بەهۆی پێکانی ئاندریاس کریستیێنسن رێگا بە بارسێلۆنا درا لە سەرەتای وەرزەوە ناوی ئۆلمۆ تۆمار بکرێت.
