هەموو شتێک بزانە؛ ئامانجی ئێستای سەڵاح چییە و هیلال دەتوانێت بۆ مۆندیالی یانەکان بیگوازێتەوە؟

یاریگا –

یانەکانی سعوودیە هیوایان بە گواستنەوەی محەمەد سەڵاح ماوە.

رۆژنامەی گاردیان بڵاویکردووەتەوە، هەرچەندە گفتوگۆکانی نێوان سەڵاح و لیڤەرپوول ئەرێنی دەردەکەون، بەڵام هیلالی سعوودی هیوایەکی بچووکی بۆ گواستنەوەی سەڵاح لە هاوینی داهاتوو و بەشداریپێکردنی لە مۆندیالی یانەکان ماوە.

لیڤەرپوول ئۆفەرێکی فەرمی خستووەتە سەر مێزی سەڵاح، تاوەکو کاروانە هەشت ساڵییەکەی لە لیڤەرپوول درێژبکاتەوە، بەڵام رۆژنامەکە دووپاتیدەکاتەوە، پەیوەندییەکانی نێوان سەڵاح و یانەکانی سعوودیە نەپچڕاوە.

سەرچاوەیەکی ئاگادار لە دۆخی سەڵاح بە رۆژنامەکی راگەیاندووە، سەڵاح یانەکانی سعوودیەی لە خەیاڵە، بەڵام دەیەوێت بەتەواوی خۆی لەگەڵ لیڤەرپوول یەکلاییبکاتەوە، ئینجا بڕیاری کۆتاییبدات.

فیفا دەیەوێت لە 1تاوەکو 10ی حوزەیران دەرگای گواستنەوەی یاریزانان بکاتەوە، ئەمەش دوای بەهۆی داواکاری بەردەوامی یانەکانی پرێمەرلیگ، ئەمەش رێگە بۆ گواستنەوەی سەڵاح بۆ هیلال و بەشداریکردنی لە مۆندیالی یانەکان خۆشدەکات.

لیڤەرپوول لە ساڵی 2023 ئۆفەرێکی بەبڕی 150 ملیۆن پاوەندی ئیتیحادی سعوودی رەتکردەوە، تاوەکو ئێستاش یانەکانی سعوودی هەوڵی گواستنەوەی دەدەن.

سەڵاح 27ی گۆڵی لەم وەرزەی پرێمەلریگدا کردووە و هێشتا 9 یاریی بۆ تەواوبوونی خولەکە ماون، بۆیە دەرگای شکاندی ریکۆردی زیاترە لەبەردەمدایە.

سەڵاح ئێستا یەک گۆڵ لە سێرجیۆ ئاگوێرۆ دوورە، تاوەکو ببێتە باشترین گۆڵکاری مێژووی پرێمەرلیگ کە ئینگلیز نەبێت. سەڵاح تاوەکو ئێستا 184 گۆڵی لە پرێمەرلیگدا کردووە.

لەسەر ئاستی مێژووی لیڤەرپوولیش، سەڵاح سێیەم باشترین گۆڵکاری یانەکەیە و خاوەنی 243 گۆڵە. رۆجەر هەنت بە 285 گۆڵ و یان راش بە 346 گۆڵ لە پێشەوەی سەڵاحەوەن.