گەورەکانی پرێمەرلیگ داوای دێلاپ دەکەن

یاریگا –

مانچێستەر یونایتد چەندین کۆبوونەوەی ئامادەکاری بۆ مێرکاتۆی هاوینە کردووە و چەند ئامانجێکیان دەستنیشانکردووە.

رۆژنامەی دەیلی مەیڵ بڵاویکردووەتەوە، مان یونایتد سەرنجی تەواوی لەسەر لیام دێلاپ، هێرشبەری ئیپسویچ داناوە. مەرجی هەڵوەشادنەوە ئەستێرە ئینگلیزییەکە 40 ملیۆن پاوەندە و لە ئەگەری دابەزینی ئیپسویچ بۆ چامپیۆنشیپ، ئەگەری چوونە دەرەوەی زۆر بەرزدەبێتەوە.

مان یونایتد ماوەیەکبوو چاودێری هوگۆ ئێکیتیکێ، هێرشبەری ئێنتراخت فڕانکفورت دەکرد، بەڵام بەهای گواستنەوەکەی دەگاتە 70 ملیۆن پاوەند، بۆیە بژاردەی دێلاپ بۆ مان یونایتد گونجاوترە.

دێلاپ ئەزموونێکی گەورەی لە پرێمەرلیگ پەیداکردووە، لەم وەرزەدا 10 گۆڵی کردووە، سەرەڕای خراپی تۆماری بردنەوەکانی یانەکەی.

یانەکانی چێڵسی، لیڤەرپوول، نیوکاسڵ یونایتد و مانچێستەر سیتیش چاودێری دۆخی یاریزانەکە دەکەن.

مانچێستەر یونایتد دەیەوێت بۆ رازیکردنی دێلاپ، سوود لە پەیوەندییە تۆکمەکەی جەیسن ویڵۆکس، بەڕێوەبەری هونەری مان یونایتد لەگەڵ یاریزانەکە وەربگرێت، چونکە پێشتر لە ئەکادیمیای مانچێستەر سیتی پێکەوە کارییانکردووە.

شەیتانە سوورەکان کار لەسەر دەستبەرداربوون لە تواناکانی مارکوس راشفۆرد و جەیدن سانچۆ دەکات، تاوەکو پارەی تەواوی بۆ گواستنەوەی یاریزانان بکەوێتە دەست.

ئاستۆن ڤیلا دەتوانێت بە 40 ملیۆن پاوەند گرێبەستی راشفۆرد بکاتە هەمیشەیی و سانچۆش هەمان بەهای هەیە.