یاریگا –
فلۆرێنتینۆ پێرێز، سەرۆکی ریال مەدرید دڵنیایی مانەوەی بە کارلۆ ئانچێلۆتی لە پۆستەکەی داوە، سەرەڕای زیادبوونی دەنگۆکانی دەستنیشانکردنی چابی ئاڵۆنسۆ وەکو جێگرەوەی راهێنەرە ئیتاڵییەکە.
پێرێز بە ئانچێلۆتی راگەیاندووە، شوێنەکەی لە ریال مەدرید پارێزراوە. رۆژنامەی مارکا بڵاویکردووەتەوە، هەینی رابردوو پێرێز و ئانچێلۆتی بەیەکەوە لە سەنتەری مەشقەکانی ریال مەدرید لە ڤالدێبێباس قاوەیەکیان خواردووەتەوە و پێرێز پاڵپشتی تەواوی بۆ کارلۆ دووپاتکردووەتەوە.
رۆژنامەکە جەختیکردووەتەوە، هەڵوێستی پێرێز بەهێزە، بەڵام لە ئەگەری روودانی رووداوی چاوەڕواننەکراو بەر لە تەواوبوونی ئەم وەرزە، لەوانەیە هاوکێشەکە بگۆڕێت.
لە دیسێمبەر/كانوونی یەکەمی ساڵی 2023، کارلۆ گرێبەستەکەی بۆ ماوەی دوو ساڵ نوێکردەوە. بەگوێرەی زانیارییەکانی رۆژنامەکە مەدریدییەکە بێت، دوای تەواوبوونی ئەم وەرزە، کارلۆ بڕیاری کۆتایی لەسەر وەرگرتنی پۆستی راهێنەرایەتی هەڵبژاردەی بەڕازیل دەدات.
ریال مەدرید بە سەرکردایەتی کارلۆ رکابەری لەسەر سەرجەم نازناوەکانی ئەم وەرزە دەکات و بەباشترین شێوە، مامەڵەی لەگەڵ زۆری ژمارەی یاریزانانی پێکراودا کرد.
لە ماوەی رابردوودا زۆر باس لە چوونی ئانچێلۆتی بۆ بەڕازیل و شوێنگرتنەوەی شوێنەکەی لەلایەن ئاڵۆنسۆ کرا، بەڵام راهێنەرە ئیسپانییەکە گرێبستی لەگەڵ بایەر لیڤەرکوزن هەیە و وەرزێکی گەورە لە بۆندسلیگا بەڕێدەکات.
خاڵێک لە گرێبەستەکەی کارلۆ و ریال مەدریددا هەیە، کارلۆ دەتوانێت پۆستێکی کارگێڕی لە دوای وازهێنانی لە راهێنەرایەتی یانەکە وەربگرێت، ئەمەش بژاردەی مانەوەی زیاتر کردووە.
گرێبەستی راهێنەرە ئیتاڵییەکە لە هاوینی ساڵی 2026 لە ریال مەدرید بەسەردەچێت و بەمەش ریال کاتێکی زۆری لەبەردەستە تاوەکو راهێنەرێک بدۆزێتەوە.
