یاریگا –
دانیێلی دی رۆسی، سیمبوولی یانەی رۆمای ئیتاڵی لەوانەیە پەیوەندی بە یانەیەکی پرێمەرلیگەوە بکات.
رۆژنامەی لاگازێتا دێلۆ سپۆرت بڵاویکردووەتەوە، پێشبینی دەکرێت لە ماوەیەکی نزیکدا، دی رۆسی کاری راهێنەرایەتی دەستپێبکاتەوە و لە ماوەی رابردوودا، گفتوگۆی لەگەڵ یانەیەکی پرێمەرلیگ کردووە.
لە سەرەتای ئەم وەرزە، بەهۆی خراپی ئەنجامەکانەوە، دی رۆسی لە راهێنەرایەتی رۆما دوورخرایەوە و کلاودیۆ رانیێری لە شوێنی دەستبەکاربوو.
بەگوێرەی زانیارییەکانی رۆژنامە ئیتاڵییەکە بێت، وۆڵڤزی خاوەنی پلەی 17ی پرێمەرلیگ، گفتوگۆی لەگەڵ دی رۆسی کردووە، تاوەکو لە جەنگی مانەوە لە نێو گەورەکانی پرێمەرلیگ یارمەتی یانەکە بدات.
دی رۆسی ئامادەیە بگەڕێتەوە کار و زمانی ئینگلیزی زۆر باشە، بۆیە رێکارەکانی وەرگرتنی بەرپرسیارێتییەکە قورس نییە. ئەفسانەکەی رۆما پەیوەندییەکی زۆر باشی لەگەڵ ئینگلتەرا هەیە، زۆربەی ماڵە خەزوورانی لە لەندەن دەژین.
یاریی داهاتووی وۆڵڤز بەرامبەر ئیپسویچ تاونە و هەردوو یانەکە ململانێی مانەوە لە پرێمەرلیگ دەکەن.
