ئەستێرەیەکی بایرن بەر لە وادەی دیاریکراو دەستی بە راهێنانەکان کردەوە
یاریگا –
کیم مین جای بەرگریکاری کۆری بایرن میونشن، پەیوەندی بە مەشق و راهێنانی تیپەکەی کردەوە، و راهێنەری تیپەکەی سوپرایز کرد.
کیم مین جای زووتر لەوەی پێشبینی دەکرا دەستی بە مەشقەکانی تیمەکەی کردەوە. پێشتر ڤینسێنت کۆمپانی راهێنەری بایرن رایگەیاندبوو کە چەند هەفتەیەک بەهۆی پێکانەوە لە یاریگاکان دووردەکەوێتەوە.
رۆژی سێشەممە بایرن میونشن بە بڵاوکردنەوەی وێنەیەکی یاریزانەکە رایگەیاند، مین جای دەستی بە راهێنانە بە کۆمەڵەکان کردووەتەوە دوای ئەوەی بەدەست پێکانەوە دەیناڵاند. ئەم هەواڵە چاوەڕواننەکراو بوو، چونکە کۆمپانی کەمتر لە دوو هەفتە لەمەوبەر رایگەیاندبوو کە بەرگریکارە تەمەن 28 ساڵانەکە ەهۆی پێکانەوە، لانیکەم چوار هەفتە لە یاریگاکان دووردەکەوێتەوە.
Wir starten mit viel Energie in die Vorbereitungen für #FCBFCSP! 💪🔋 pic.twitter.com/T2at5OXDEG
— FC Bayern München (@FCBayern) March 25, 2025
راهێنەری بایرن ئەوکاتە سەبارەت بە بارودۆخی یاریزانەکەی روونکردەوەیدا و گوتی:
ئێمە زانیاریمان لەسەر کێشەی ماسولکەی ئاخیلی پێی هەبوو، دەبێت وریا بین فشاری زۆر لەسەری نەکەین و ئاستی چالاکیەکانی بەڕێوەببەین. هیوادارم دابڕانی زۆر نەبێت، بەڵام بۆ چەند هەفتەیەک لە یاریگاکان دوور دەکەوێتەوە.
ئامادەنەبوونی کیم مین جای لە یارییە نێودەوڵەتییەکانی کۆریای باشوور کاردانەوەی زۆری لە وڵاتەکەی بەدوای خۆیدا هێنا. هۆنگ میونگ بۆ، راهێنەری هەڵبژاردەی کۆریای باشوور، بایرن میونشنی بە هۆکاری باری جەستەیی کیم زانی. پێی وابوو میونشن نەیتوانیوە رێوشوێنی پێویست بگرێتەبەر بۆ ئەوەی یاریزانەکە لە پێکان بپارێزێت.
زوو گەڕانەوەی کیم هەواڵێکی خۆشە بۆ بایرن میونشن، چونکە تیپەکە لە قۆناغێکی چارەنووسسازدایە لەم وەرزەدا. بایرن میونشن لە قۆناخی چارەکی کۆتایی چامپیۆنزلیگ رووبەڕووی ئینتەرمیلان دەبێتەوە، بۆندسلیگاش دەچێتە ناو هەفتەی کۆتایی و یەکلاکەرەوە. گەڕانەوەی ئەم بەرگریکارە بەرگری بایرن لەم ساتە گرنگانەدا بەهێزتر دەکات.
