نێیمار دەگەرێتەوە بارسێلۆنا؟ خۆی وەڵام دەداتەوە
یاریگا –
نێیمار و باوکی لە دوایین چاوپێکەوتنیان سەبارەت بە داهاتووی ئەو سوپەرستارە بەڕازیلییە زانیاری نوێیان ئاشکرا کرد.
ئەگەری گەڕانەوەی نێیمار جونیۆر لە هاوینی داهاتوو بۆ بارسێلۆنا، کاتێک کامپ نو دەتوانێت میوانداری سەرجەم پاڵەوانەتیەکان بکات، پێدەچێت مەحاڵ بێت. دوای چاوپێکەوتنێکی سەرلەبەیانی ئەمڕۆ لە نێوان نێیمار و باوکیدا، ئەوە دووپاتکرایەوە کە ئەو یاریزانە ناگەڕێتەوە بارسێلۆنا.
دوای سەرکەوتنی سانتۆس و درەوشاوەیی نێیمار لە یارییەکەدا، لەگەڵ باوکی لە چاوپێکەوتنێکی تایبەتدا لەگەڵ کەناڵی تی ئێن تی سپۆرتی بەڕازیلی لە دوای یارییەکە چەندان نهێنیان ئاشکرا کرد.
باوکی نێیمار سەبارەت بە گەڕانەوەی کوڕەکەی بۆ سانتۆس و گرێبەستی پێنج مانگە گوتی:
ئێمە لێرە نین بۆ ئەوەی تەنیا پێنج مانگ بمێنینەوە، ئێمە لێرەین بۆ ئەوەی دەرفەت بدەین بە سانتۆس کە لەم ماوەیەدا پێکهاتەکەی دووبارە بنیات بنێتەوە و یارمەتی بدات بۆ ئەوەی بگەڕێتەوە سەر رێچکەی جارانی.
#Neymar Junior’s father has told TNT Sports Brasil that his son intends to be at Santos beyond the summer, amid talk of a return to #Barca. pic.twitter.com/tQpT0K5yDl
— Football España (@footballespana_) February 17, 2025
هەروەها نێیمار لە دوای قسەکانی باوکی گوتی:
پێویستە ئارام بین. ئەمە سەرەتای سەردەمێکی گەورەیە بۆ سانتۆس. نەمدەویست گرێبەستێکی درێژ واژۆ بکەم چونکە نەمدەزانی دەگەڕێمەوە یان نا. نەمدەزانی باری جەستەییم چۆن دەبێت. هەربۆیە بۆ نیو وەرز گرێبەستم کرد.
ئەستێرە بەڕازیلییەکە درێژەی بە قسەکانیدا و گوتی:
سانتۆس دەزانێت چەندە خۆشەویستی و رێزم بۆ ئەم یانەیە هەیە. تا ئەو کاتەی لە یاریگادا بم، کە حەز دەکەم زۆرترین خولەک لەوێ بم، 100% توانای خۆم پێشکەش دەکەم. با چێژ لەم ساتە و هەموو خولەکێکی یارییەکان وەربگرین. ئەمە سەرەتای سەردەمێکی گەورەیە بۆ سانتۆس و دڵنیام لێی. یانەی سانتۆس جارێکی دیکە دەگاتە لوتکە و دەگەڕێتەوە بۆ ئەو شوێنەی کە شایەنییەتی.
نێیمار تەنیا لە ماوەی دە رۆژدا چوار یاری لەسەریەک لەگەڵ سانتۆس کردووە و بەرەبەیانی ئەمڕۆ توانی یەکەم گۆڵی خۆی تۆمار بکات.
