دوایین پەرەسەندن؛ ئەستێرەیەکی میلان پەیوەندی بە تۆتنهام دەکات

یاریگا –

گفتوگۆکانی تۆتنهام و ئەیسی میلان بۆ گواستنەوەی فیکایۆ تۆمۆری گەیشتووەتە ئاستێکی پێشکەوتوو.

تۆڕی هەواڵی سکای سپۆرتس بڵاویکردووەتەوە، تاوەکو ئێستا بەرگریکاری نێودەوڵەتی ئینگلیزی بە بیرۆکەی گواستنەوەی بۆ تۆتنهام رازینەبووە.

دووشەممە کاتژمێر 02:00ی بەرەبەیان، بازاڕی گواستنەوەکان لە پرێمەرلیگ دادەخرێت و تۆتنهام هەوڵدەدات لەم دوو رۆژەدا گواستنەوەکە تەواو بکات.

هەریەکە لە کریستیان رۆمێرۆ و رادو دراگوسین تووشی پێکانبوون و بۆ ماوەیەک دووردەکەونەوە، ئەمەش وایکردووە ئانج پۆستێکۆگلو، بیر لە جێگرەوەکان بکاتەوە.

تۆمۆری بەرهەمی ئەکادیمیای چێڵسییە و بەخواستن یاریی بۆ یانەکانی برایتن، هەڵ سیتی و دێربی کاونتی کردووە.

لە هاوینی ساڵی 2021 پەیوەندی بە میلانەوە کرد، خاوەنی پێنج گۆڵە لە کۆی 102 یاریی، هەروەها پێنج یاریی نێودەوڵەتی لەگەڵ هەڵبژاردەی ئینگلتەرا کردووە.