یاریزانانی یانەی هەولێر پاداشتی دارایی دەکرێن

یاریگا –

بەبۆنەی بەدەستهێنانی سێ بردنەوەی لەسەریەک لە خولی ئەستێرەکانی عێراق، پارێزگاری هەولێر بڕیاریداوە پاداشتی یاریزانانی یانەی هەولێر بکات.

تۆڕی وەرزشی یاریگا لە سەرچاوەیەک لەناو یانەی هەولێر زانیویەتی، ئومێد خۆشناو پارێزگاری هەولێر بەبۆنەی بەدەستهێنانی بردنەوەکەیان بەرامبەر نەفت بڕیاریداوە پاداشتی دارایی یاریزانانی یانەی هەولێر بکات، کە یانەکەی قەڵاومنارە لە دوایین سێ یاری لە خولی ئەستێرەکانی عێراق 2-0 لە نەفتی بردەوە، 3-1 لە کەربەلای بردەوە و لە گەڕی پازدەمیش 4-2 لە کەرخی بردەوە.

درەنگانی شەوی رابردوو شاندی یانەی هەولێر گەڕانەوە پایتەخت، لە دەروازەی شار سەدان هاندەر پێشوازییان لە شاندی یانەکە کرد و بەیەکەوە ئاهەنگیان گێڕا.

هەولێر دوای تێپەڕبوونی 17 گەڕ لە خولی ئەستێرەکانی عێراق 28 خاڵی کۆکردووەتەوە و لە پلەی شەشەمی خولەکە دێت.