دوایین پەرەسەندن؛ گفتوگۆکانی مانچێستەر یونایتد و دۆرگو بەکوێ گەیشتووە؟

یاریگا –

مانچێستەر یونایتد گفتوگۆکانی لەگەڵ لێچی بۆ گواستنەوەی پاتریک دۆرگو بردووەتە ئاستێکی پێشکەوتوو.

تۆڕی هەواڵی سکای سپۆرتس بڵاویکردووەتەوە، گفتوگۆکان ئەمڕۆ لە نێوان بەرپرسانی هەردوو یانە بەردەوام دەبن و لەوانەیە رێککەوتنی کۆتایی لەسەر گواستنەوەی دۆرگو بکرێت.

تاوەکو ئێستا گرێبەستەکە تەواو نەبووە، مانچێستەر یونایتد دەیەوێت بە تەواوی لە گرێبەستەکە رازیبێت، ئینجا دوا هەنگاو بنێت. پێشبینی ناکرێت مەرجەکانی کەسی کێشێ دروستبکەن.

دۆرگو لە هاوینی ساڵی 2022 بەبڕی تەنیا 168 هەزار پاوەند لە نۆرشلاندی دانیمارکییەوە پەیوەندی بە لێچی کرد. دۆرگو لە هاوینی ساڵی 2023 یەکەم یاریی فەرمی لەگەڵ لێچی کرد، لەو ساتەوە 57 یارییکردووە و خاوەنی پێنج گۆڵ و دوو ئەسیستە.

مانچێستەر یونایتد دوای خەرجییەکانی هاوینی رابردوو بە گواستنەوەی کۆمەڵێک یاریزانی وەکو لێنی یۆرۆ (58.9 ملیۆن پاوەند) و ماتیس دی لیخت (42.9) ملیۆن پاوەند، ئێستا سیاسەتێکی نوێ پەیڕەودەکات و دەیەوێت دەستبەرداری چەند یاریزانێک ببێت، ئینجا پارە خەرج بکات.

بژاردەی دووەمی مانچێستەر یونایتد کێیە؟

تۆڕی هەواڵی سکای سپۆرتس بڵاویکردووەتەوە، ئالڤارۆ فێرناندێز، بژاردەی دووەمی مانچێستەر یونایتدە، هەرچەندە بۆ ماوەی سێ ساڵ و نیو لە ئۆڵدترافۆرد بوو، بەڵام هیچ یارییەکی نەکرد، بەڵکو بە خواستن یاریی بۆ یانەکانی پرێستن نۆرس ئێند، گرانادا و بێنفیکا کردووە.

فێرناندێز لە هاوینی ساڵی رابردوو بەبڕی شەش ملیۆن یۆرۆ پەیوەندی بە بێنفیکا کرد، بەڵام خاڵێک لە گرێبەستەکەیدا هەیە، کە ماف بە مانچێستەر یونایتد دەدات، دەستبەجێ بیگوازێتەوە.

بەرگریکارە ئیسپانییەکە لەم وەرزەدا 30 یاریی لە سەرجەم پاڵەوانیەتییەکان لەگەڵ بێنفیکا کردووە، خاوەنی سێ گۆڵ و چوار ئەسیستە.