ئێستا؛ گرێبەستی راهێنەرێکی پاڵەوانی ئەوروپا نوێکرایەوە

یاریگا –

لویس دێلا فوێنتێ، گرێبەستەکەی لەگەڵ هەڵبژاردەی ئیسپانیا تاوەکو دوای یۆرۆی 2028 نوێکردەوە.

راهێنەری 63 ساڵان، لە دوای دەست لەکارکێشانەوەی لویس ئێنریکێ لە دوای مۆندیالی 2022، ئەرکی مەشقی هەڵبژاردەی لاڕۆخای لەئەستۆگرت.

گرێبەستی پێشووی دێلا فوێنتێ تاوەکو دوای مۆندیالی 2026 بوو، بەڵام ئێستا گرێبەستەکەی بۆ دوو ساڵی دیکەش زیادکرا.

دێلا فوێنتێ لەگەڵ هەڵبژاردەی ئیسپانیا، یۆرۆی 2024ی بەدەستهێنا، دوای بردنەوەی لە یاریی کۆتایی بەرامبەر هەڵبژاردەی ئینگلتەرا.

بەر لە وەرگرتنی ئەرکی مەشقی هەڵبژاردەی ئیسپانیا، دێلا فوێنتێ بۆ ماوەی نۆ ساڵ بەرپرسیارێتی جیاوازی لە هەڵبژاردەکانی ئاستە جیاوازەکانی ئیسپانیا گێڕا، لە ساڵی 2015 نازناوی یۆرۆی لەگەڵ هەڵبژاردەی ژێر 19 ساڵانی ئیسپانیا بەدەستهێنا، دواتر لە ساڵی 2019 نازناوی یۆرۆی لەگەڵ هەڵبژاردەی ژێر 21 ساڵان بردەوە و خاوەنی مێدالیای زیوی ئۆڵێمپیادی تۆکیۆی 2021 بوو.

دێلا فوێنتێ لە کاروانی وەرزشی خۆیدا، یاریی بۆ یانەکانی ئاتلێتیک بیلباو، سێڤییا و ئالاڤێس کردووە، لە ساڵی 1994 وازی لە یاریی هێنابوو.

یاریی داهاتووی ئیسپانیا بەرامبەر هۆڵەندایە لە قۆناخی چارەکی کۆتایی نەیشنزلیگ، کە بڕیارە لە ناوەڕاستی مارس/ئاداری داهاتوو بکرێت.