یاریگا –
شەوی رابردوو لە یارییەکانی گەڕی 21ـی لالیگا، بارسێلۆنا لە یاریگای مۆنجویک میوانداری ڤاڵێنسیای کرد و یارییەکەی 7-1 بردەوە.
ئانسو فاتی ئیسپانی و هێرشبەری لاوی یانە کاتالۆنییەکە جارێکی دیکە دەرفەتی یاریکردنی پێنەدرا و بەدرێژایی یارییەکە لەسەر کورسی یەدەک مایەوە.
هانزی فلیکی راهێنەری بارسێلۆنا لەبارەی چارەنووسی فاتی ئاشکرایکرد، یاریزانەکە دەیەوێت لە بارسێلۆنا بمێنێتەوە، منیش پاڵپشتی تەواوی دەکەم.
ئانسو فاتی دەیەوێت لە بارسێلۆنا بمێنێتەوە، لە مەشقەکانیش ئاستی بەرزە بۆیە پاڵپشتی لە مانەوەی دەکەم.
راهێنەرە ئەڵمانییەکە لە سەرەتای وەرزدا ستایشێکی زۆری فاتی کرد. بەڵام یاریزانە لاوەکە هەر لە سەرەتای وەرزەکە تووشی پێکانێکی سەخت بوو. بەو هۆیە لەگەڵ تیپەکە بۆ یارییە ئامادەکارییەکان گەشتی ئەمریکای نەکرد.
دوای چاکبوونەوەی لە پێکانەکەی بەتەواوی پشتگوێخراوە، بەجۆرێک بەدرێژایی ئەم وەرزە تەنیا 186′ خولەک دەرفەتی یاریکردنی پێدراوە.
بەگوێرەی میدیاکانی ئیسپانیا، بارسێلۆنا دەیەوێت دەستبەرداری فاتی ببێت. بەڵام یاریزانەکە نایەوێت بارسا جێبهێڵێت.
