یاریگا –
ئۆریلیەن چوامینی بەهۆی پێکانەوە لە یاریی ئەمڕۆ بەرامبەر لاس پالماس بێبەش دەبێت و لە لیستی یاریزانانی ریال مەدرید دوورخرایەوە.
ئارانچا رۆدریگێز رۆژنامەنووسی ئیسپانی ئاشکرایکردووە، ئۆریلیەن چوامینی ناوەڕاستکاری فەڕەنسی لە پێی هەست بە ئازار دەکات و ناتوانێت لە یاریی بەرامبەر لاس پالماس ئامادە بێت، دانی سێبایۆس لە شوێنی ئەو ناوەڕاستکارە لە پێکهاتەی سەرەکی دەبێت.
ریال مەدرید بۆ یارییەکەی لاس پالماس کە کاتژمێر 18:15 دەستپێدەکات، لە توانای هەریەکە لە لوکا مۆدریچ، ئێدوارد کاماڤینگا، ئۆریلیەن چوامینی، ڤینیسیوس جونیۆر، دانی کارڤاخال و ئیدێر میلیتاو بێبەش دەبێت و هەر شەش یاریزانەکە بۆ یارییەکە بەردەست نابن.
یانەی ریال مەدرید لە بەیاننامەیەکیدا پێکانی چوامینی راگەیاندووە و ئاشکرایکردووە، چوامینی بەهۆی پێکانەوە لە یارییەکەی لاس پالماس بێبەش دەبێت.
ℹ️ @atchouameni, ruled out of game through injury.#RealMadridLasPalmas
— Real Madrid C.F. 🇬🇧🇺🇸 (@realmadriden) January 19, 2025
میگێل ئانخێل دیاز رۆژنامەنووسی ئیسپانی رایگەیاندووە، چوامینی لە پێی چەپی هەست بە ئازار دەکات و کارلۆ ئەنچیلۆتی بڕیاریداوە لە یارییەکەی ئەمڕۆ دووری بخاتەوە، چیما ئاندرێس جاکۆبۆ رامۆن بۆ شوێنگرتنەوەی ئەو یاریزانە فەڕەنسییە بانگهێشت کراون.
کارلۆ ئەنچیلۆتی راهێنەری ریال مەدرید دوێنێ لە کۆنگرەی رۆژنامەوانی یارییەکەی لاس پالماس رایگەیاند، داڤید ئالابا لەم یارییە ئامادە دەبێت و لەوانەیە لە نیوەی دووەم ئەگەر ریال مەدرید لەپێشەوە بێت و دۆخی باش بێت، چەند خولەکێک یاریی بکات، کە 396 رۆژە بەهۆی پێکانی ئەژنۆی لە یاریگاکان دابڕاوە.
