بەهۆی بردنەوەی کلاسیکۆ، لاپۆرتا یاریزانەکانی پاداشت دەکات

یاریگا –

خوان لاپۆرتا سەرۆکی یانەی بارسێلۆنا، بە هۆی بردنەوەی تیپەکەی لە یاریی کلاسیکۆ و یاری کۆتایی جامی سوپەری ئیسپانیا، بەڵێنی بە یاریزانەکانی داوە تاوەکوو پاداشتی داراییان بکات.

یاریزانانی بارسێلۆنا بەهۆی سەرکەوتنە گرنگەکەیان بەرامبەر ریال مەدرید بە ئەنجامی(2-5)، پاداشتێکی زیادە وەردەگرن هەروەها یەکەم نازناو لە ژێر دەستی هانسی فلیک پاداشتی دارایی زیاتر بۆ ژووری جلگۆڕین دەهێنێت. بە گوێڕەی هەواڵێکی پێگەی ئاس، خوان لاپۆرتا لە دوای یارییەکە بەڵێنیدا پاداشتێکی دارایی وەک سوپاسێک بۆ ئەم سەرکەوتنە پێشکەش بکات کە ئەمە بە لای یاریزانەکانەوە جێگەی خۆشحاڵی بوو و بە چەپڵەوە پێشوازییان لێکرد.

بڕە پارەی پاداشتەکە هێشتا گفتوگۆی لەسەر نەکراوە، بەڵام لە سەرەتادا بڕە پارەیەکی هاوشێوە باسکرا کە دوو ساڵ لەمەوبەر دوای بردنەوەی جامی سوپەر پێیان درابوو. لەو کاتەدا هەر یاریزانێک 100 هەزار یۆرۆی وەرگرتبوو، ئەندامانی ستافی تەکنیکیش 10 هەزار یۆرۆیان وەرگرت.

پێویستە ئاماژە بەوە بکرێت کە زۆربەی نازناوەکان لە گرێبەستی یاریزانەکاندا پاداشتی تایبەتیان هەیە. بۆیە پاداشتەکانی لالیگا و چامپیۆنزلیگ و جامی ئیسپانیا پێشوەختە دیاری کراوە و نزیکەی یەک ملیۆن یۆرۆیە. لە حاڵەتی جامی ئیسپانیا تەنها  ئەگەر نازناوێکی تری لەگەڵدا بێت پاداشتی زیادە هەیە، بۆیە ئەگەر تەنها ئەم جامە ببەنەوە، بە گشتی هیچ پاداشتێکی زیادە وەرناگرن. جامی سوپەری ئیسپانیاش تەنانەت لە گرێبەستەکانیشدا ئاماژەی پێنەکراوە، بۆیە هەر بژاردەیەکی پاداشت دەبێت راستەوخۆ لەگەڵ بەرپرسانی یانەکە دانوستان بکرێت.